काठमाडौं ।यो वर्षको हेम–सुनिल जोखिमपूर्ण पत्रकारिता पुरस्कार बाट तीन जना पत्रकार पुरस्कृत भएका छन् । नेपाल पत्रकार महासंघ नेपाल टेलिभिजन प्रतिष्ठान शाखाले प्रदान गर्ने ५१ हजार रुपैयाँ राशीको पुरस्कार यो वर्ष नेपाल टेलिभिजन र एभिन्यूज टेलिभिजनका पत्रकारहरुले संयुक्त रुपमा प्राप्त गरेका छन् ।
पुरस्कृत हुनेमा नेपाल टेलिभिजनकी दोलखा सम्वाददाता मन्दिरा थापा र एभिन्यूज टेलिभिजनका सरोज पौडेल र क्यामरापर्शन सुरेश रजक छन् । पुरस्कृतहरुलाई नेपाल टेलिभिजनमा आयोजित विशेष समारोह बीच सञ्चार तथा सूचना प्रविधिमन्त्री ज्ञानेन्द्रबहादुर कार्कीले पुरस्कार र सममानपत्र प्रदान गरे ।
नेपाल पत्रकार महासंघ नेपाल टेलिभिजन प्रतिष्ठान शाखाले आफ्ना दिवंगत सहकर्मीद्वय हेमराज भण्डारी र सुनिल सिंहको स्मृतिमा स्थापना गरेको पुरस्कार बाट जोखिमयुक्त र साहसिक पत्रकारिता गर्दै आएका पत्रकारहरुलाई २०६३ साल देखि वर्षेनी पुरस्कृत गर्दै आएको छ ।
