लन्डन। बेलायतका प्रधानमन्त्री ऋषि सुनकले आइतबार सत्तारुढ कन्जरभेटिभ पार्टीका अध्यक्ष नदिम जाहावीलाई बर्खास्त गर्नुभएको छ । कर मामिलाको अनुसन्धानपछि अध्यक्ष जाहावीलाई दोषी देखिएपछि मन्त्री पदको पदीय मर्यादाको ‘गम्भीर उल्लंघन’ गरेको भन्दै सरकारबाट बर्खास्त गरिएको हो। गत वर्ष राजनीतिक उथलपुथलको अवधिमा बेलायतको अर्थमन्त्री रहेका जाहावीलाई पछिल्लो समय करोडौं डलरको भुक्तान नगरिएका कर बिल सुल्झाएको आरोपमा राजीनामा दिन व्यापक दबाब दिइएको थियो। त्यसपछि व्यापक विवादमा आएका जाहावीलाई बर्खास्त गरिएको हो।
प्रधानमन्त्री सुनकले भन्नुभयो, ‘स्वतन्त्र अनुसन्धान पूरा भएपछि उहाँबाट पदीय मर्यादाको गम्भीर उल्लंघन भएको पाइएको छ र उहाँलाई मन्त्री पदबाट हटाउने निर्णयबारे राजालाई पनि जानकारी गराइएको छ।’ जाहावीले सुरुमा आफ्नो कर मामिलाको बारेमा मिडिया रिपोर्टहरूलाई अस्वीकार गरे पनि पछिल्लो समय केही अनियमितता भएको स्वीकार गर्नूभएको थियो । गार्जियनले करिब ५० मिलियन पाउन्ड (६.१९ मिलियन अमेरिकी डलर) को अनुमानित कर बिलमा अनियमितता भएको उल्लेख गरेको छ। बेलायतमा यदि कसैले समयमै कर तिर्न असफल भएमा जरिवानाको नियम लागू हुन्छ।
