काठमाडौँ । नेकपा(माओवादी केन्द्र)का प्रवक्ता अग्निप्रसाद सापकोटाले तत्काल सत्ता समीकरणमा केही फेरबदल नहुने स्पष्ट पारेका छन् । कांग्रेसका सभापति शेरबहादुर देउवा र एमालेका अध्यक्ष केपी शर्मा ओलीबिच भएको भेटवार्ताले ल्याएको तरंगबारे प्रष्ट पार्दै उनले गठबन्धन फेरबदल नहुने प्रष्ट पारेका हुन् । आइतबार र सोमबार प्रधानमन्त्री पुष्पकमल दाहाल प्रचण्ड र ओलीबिच भएको भेटवार्तामा यही सरकारलाई थप प्रभावकारी बनाएर जाने विषयमा सहमति भएको उनले बताए ।
‘तत्काल सत्ता समीकरण फेरबदल हुँदैन । उहाँहरू(प्रधानमन्त्री र ओली)बिच अहिले सम्मको समीक्षा भएको छ । सरकारलाई कसरी प्रभावकारी बनाउने ? भन्ने विषयमा बिहङ्गम कुरा भएको छ । अहिले यही समीकरणलाई कायम राखेर जाने कुरालाई करिब सहमति भएको छ’, प्रचण्ड–ओली भेटबारे उनले भने, ‘प्रधानमन्त्री र ओलीका बिचमा सरकारलाई प्रभावकारी बनाउने विषयमा सहमति भएको छ । बाहिर जे तरंग छ, यसमा कुनै दुबिधा हुने ठाउँ छैन । अहिले तत्काल यो समीकरणमा फेरबदल हुँदैन । यो कुरा प्रष्ट पार्न चाहन्छु ।
अहिले सत्ता गठबन्धनमा तत्कालै त्यस्तो समस्या आउँदैन । यो गठबन्धनलाई कायम राखेर जाने विषयमा सहमति भएको छ । कुन कुन विषयमा कसरी जाने भन्ने विषयमा ठोस रूपमा छलफल हुँदै जान्छ ।’ शनिबार ओली निवास बालकोटमा भएको देउवा र ओलीबिचको भेटवार्ताले सत्ता समीकरण फेरबदल हुन लागेको चर्चा चलेपछि यस विषयमा सापकोटाले प्रष्ट पारेका हुन् ।
