मकवानपुर । बागमती प्रदेश सरकारको आगामी आर्थिक वर्षको बजेट संसद्मा प्रस्तुत गर्न स्वीकृति दिइएको छ । शनिबार साँझ बसेको मन्त्रिपरिषद् बैठकले सरकारको आगामी आर्थिक वर्षको बजेट संसद्मा प्रस्तुत गर्न स्वीकृत गरेको हो ।
आजको प्रदेश सभा बैठकमा प्रस्तुत हुने प्रदेशको आगामी आर्थिक वर्ष २०८१/०८२ को अनुमानित आय व्ययसहितको बजेट स्वीकृत गरेको सरकारका प्रवक्ता एवम् आन्तरिक मामिला तथा कानुन मन्त्री गंगा नारायण श्रेष्ठले बताए । मन्त्रिपरिषद्को बैठक सकिएपछि केहीबेरमा बस्ने प्रदेश सभा बैठकमा प्रदेशका आर्थिक मामिला तथा योजना मन्त्री जगन्नाथ थपलियाले उक्त बजेट प्रदेश सभामा प्रस्तुत गर्ने कार्यसूची रहेको छ ।
प्रदेश सरकारले आगामी आर्थिक वर्षको बजेट चालु आवकै हाराहारीमा ल्याउने बुझिएको छ । यसअघि प्रदेश सरकारले चालु आर्थिक वर्षका लागी ६२ अर्ब ७० करोड ९० लाख ७८ हजार रुपैयाँको बजेट ल्याएको थियो ।
