अछाम ।अछामको पञ्चदेवल विनायक नगरपालिका–४ स्थित कालिकास्थानमा १७ वर्षीय किशोर मृत भेटिएको घटना अनुसन्धान गर्न केन्द्रीय अनुसन्धान ब्यूरोको टोली परिचालन गरिएको छ । शनिवार कक्षा १० मा अध्ययनरत विनोद शाही जंगलमा मृत भेटिएका थिए । घटना अनुसन्धानमा सुदूरपश्चिम प्रदेशमा रहेको ब्यूरोको टोलीलाई पठाइएको प्रहरी प्रवक्ता (एसएसपी) विष्णु केसीले रातोपाटीलाई बताए । कञ्चनपुरमा निर्मला पन्त हत्या अनुसन्धानमा खटिएका डिएसपी मनोहर भट्ट नेतृत्वको टोली घटनास्थलमा पुगेको छ ।
विनोद पञ्चदेवल विनायक नगरपालिका–४ स्थित कालिकास्थान स्थित मध्यपहाडी लोकमार्ग बाट १ किमी तल जंगलमा उनी मृत फेला परेका हुन् । आक्रोशित स्थानीयले प्रहरीलाई घटनास्थलमा जान रोकेका थिए । तर, अहिले शव घटनास्थल बाट निकालेर पोष्टमार्टम गर्न स्थानीय सहमत भएका छन् । अनुसन्धानको प्रक्रिया शुरु गरिएको अछामका प्रमुख जिल्ला अधिकारी विश्वराज मरासैनीले बताए । प्रजिअ मरासैनीले भने–‘चिकित्सक र अनुसन्धानमा संलग्न प्रहरी टोली घटनास्थलमा छन् ।’
नेपाली सेनाको सहयोग लिएर शवलाई डोरीले तानेर मध्यपहाडी लोकमार्गमा ल्याउने प्रयास भइरहेको छ । घटनास्थलमा तालिम प्राप्त कुकुर पनि परिचालन गरिएको सुदूरपश्चिम प्रदेश प्रहरी कार्यालयका डीआईजी मोहनकुमार आचार्यले बताए । शनिवार आक्रोशित समूहले इलाका प्रहरी कार्यालय विनायकमा तोडफोड गरेका थिए । स्थानीयले प्रहरीको ना.१ झ १२८६ नम्बरको गाडी तोडफोड गरेर पञ्चदेवल विनायक नगरपालिकामा तालाबन्दी गरेका छन् । भीडलाई नियन्त्रणमा लिन प्रहरीले ८ राउण्ड हवाई फायर र ४ राउण्ड अश्रुग्याँस प्रहार गरेको थियो ।
बलबहादुर शाहीको छोरा १७ वर्षीय मृतक विनोदबहादुर शाहीको मोबाइल शव भन्दा माथि मध्यपहाडी लोकमार्गमा भेटिएको छ । उनले लगाएको चप्पल भिरमा अड्किएको अवस्थामा भेटिएको छ । उनी जेठ १७ मा राति रिठा टोल बाट हराएका उनको परिवारले प्रहरीलाई जानकारी गराएका छन् ।
