काठमाडौं । जनता समाजवादी पार्टी नेपालका प्रमुख सचेतक एवं केन्द्रीय सदस्य प्रमोद साह माथि आक्रमण भएको छ । सांसद साह माथि सर्लाहीको ईश्वरपुर नगरपालिका बयलबास बजारमा बिहान १० वजे संघातिक आक्रमण भएको हो ।
सर्लाही क्षेत्र नम्बर १ बाट निर्वाचित सांसद साह माथि जनमत पार्टीका कार्यकर्ताले आक्रमण गरेको बताइएको छ । ईश्वरपुर नगरपालिकाको युवा क्लव उद्घाटन कार्यक्रममा जाँदा सुरुमा उनलाई अवरोध गरेका थिए । निर्वाचन आचारसंहिता उल्लंघन गरेको भन्दै जनमत पार्टीका कार्यकर्ताले अवरोध गरेपछि जसपा र जनमतका कार्यकर्ता बीच झडप भएको थियो ।
आक्रमण बाट साह घाइते भएको उनका आफन्त अनिल झाले बताए । उनका साथमा रहेका सुरक्षा गार्डलाई पनि कुटपिट भएको बताइएको छ । गार्डको पेस्तोल पनि खोसिएको झाको भनाइ छ । दुवै जनाको स्थानीय अस्पतालमा उपचार भइरहेको छ ।
