काठमाडौं । प्रधानमन्त्री केपी ओलीले सोमबारको मन्त्रिपरिषद् बैठकमा विदेश भ्रमणबारे तीन वटा निर्देशन दिएका छन् ।
एक– फटाफट काम गर्नुपर्ने बेला भएकाले सकेसम्म मन्त्री, सचिव लगायत उच्च पदस्थ विदेश भ्रमणमै नजाने । दुई– जानैपर्ने भ्रमण भए अवधि छोट्याउनैपर्ने । तीन– भ्रमण टोलीमा महिला हुनैपर्ने । ‘भ्रमण मण्डलमा दुई जना मात्रै भए पनि कम्तीमा एक महिला अनिवार्य हुनैपर्ने निर्णय भएको छ,’ एक मन्त्रीले भने, ‘तर रातदिन खटेर काम गर्नुपर्ने बेला भएको भन्दै प्रधानमन्त्रीले सकेसम्म भ्रमण नै नगर्न निर्देशन दिनुभएको छ ।’
यसअघि तारन्तार विदेश भ्रमणमा गएको, लामो समय उतै रहेको भन्दै कतिपय मन्त्री आलोचनाको तारोमा पर्ने गरेका थिए । कतिपय मन्त्री त पदमुक्त हुँदा विदेशमै रहने गरेका दृष्टान्त समेत रहेको भन्दै प्रधानमन्त्रीले काम देखाउने प्रतिस्पर्धामा खरो उत्रन निर्देशन दिएको ती मन्त्रीले भने । सोमबारको मन्त्रिपरिषद बैठकले उद्योग वाणिज्य तथा आपूर्तिमन्त्री दामोदर भण्डारी र युवा तथा खेलकुदमन्त्री तेजुलाल चौधरीको विदेश भ्रमण स्वीकृत गरेको छ ।
