काठमा। बाँसबारी छाला जुत्ता कारखानाको जग्गा किनबेच प्रकरणमा केन्द्रीय अनुसन्धान ब्युरो (सीआईबी)ले नेपाली कांग्रेसका सांसद तथा उद्योगपति विनोद चौधरीसँग बयान लिन सुरु गरेको छ ।
आज बिहान बयान दिन चौधरी आफै सीआईबी कार्यालयमा पुग्नुभएको छ । त्यसलगत्तै सरकारी वकिलको कार्यालयमा लगेर उहाँसँग बयान लिन सुरू गरिएको जिल्ला सरकारी वकिल कार्यालय काठमाडौंले जनाएको छ । उहाँसँग बयान लिने क्रम जारी रहेको कार्यालयले जनाएको छ । हिजो सीआईबीले सभामुख देवराज घिमिरेलाई पत्र लेख्दै बाँसबारी जग्गा प्रकरणमा चौधरी माथि अनुसन्धान भइरहेको जानकारी गराएको थियो ।
गत आइतबार उपप्रधान तथा गृहमन्त्री रवि लामिछानेले चौधरीको बयान लिन निर्देशन दिनुभएको थियो । बाँसबारीको १० रोपनी सरकारी जग्गा कीर्ते गरी निजी बनाएको भन्दै सीआईबीले अनुसन्धान गरिरहेको छ । यसअघि चौधरीका भाइ समेत रहनुभएका उद्योगपति अरुण चौधरीलाई पक्राउ गरेर अनुसन्धान अघि बढाइएको थियो । तर, उहाँ अदालतको आदेशबाट रिहा हुनुभइसकेको छ ।
