अमेरिकी सहयोग नियोग मिलिनियम च्यालेन्ज कर्पोरेसन (एमसीसी)अघि बढाउने बिषयमा सत्तारुढ प्रमुख तीन पार्टीका नेताहरुबीच भएको छलफल बिना निष्कर्ष टुंगिएको छ।
प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल र नेकपा एकीकृत समाजवादीका अध्यक्ष माधवकुमार नेपालबीच शनिबार प्रधानमन्त्रीको सरकारी निवासमा भएको एक घण्टा लामो भेटवार्तामा प्रधानमन्त्री देउवाले प्रतिनिधिसभाको अब बस्ने बैठकमा एमसीसी सम्झौता पेस गर्नुपर्ने प्रस्ताव गरेका थिए भने दाहाल र नेपालले यथास्थितिमा एमसीसी अघि बढाउन नसकिने भन्दै अस्वीकार गरेको बताईएको छ।
‘तीन जना नेताहरूबीचको भेटमा एमसीसीकै बारेमा छलफल भएको हो । यथास्थितिमा एमसीसी अगाडि बढाउन नसकिने अडान प्रचण्ड र माधव नेपालले दोहोर्याउनुभएको छ,’ ती नेताका सचिवालयले भनेको छ, ‘सर्वपक्षीय सहमति नबन्दासम्म एमसीसी थाती राखौं भन्नेबारेमा छलफल भएको छ । तर, प्रधानमन्त्री त्यसका लागि राजी भइसक्नुभएको छैन ।’
अमेरिकी सहायक विदेशमन्त्री डोनाल्ड लूले टेलिफोन गरेर एमसीसी अघि बढाउन दबाब दिएपछि तीन शीर्ष नेताहरूबीच भएको यो दोस्रो भेट हो । उनीहरूले बिहीवार बिहान पनि एमसीसीका सन्दर्भमा बालुवाटारमा छलफल गरेका थिए ।
छलफलमा एमसीसी कार्यान्वयनमा आएको अमेरिकी दबाबको बारेमा पनि छलफल भएको बताइएको छ ।
