काठमाडौँ । राष्ट्रिय प्रजातन्त्र पार्टी (राप्रपा)का पूर्वकेन्द्रीय सदस्य बलबहादुर केसीको निधन भएको छ । बिहीबार अपराह्न उपचारको क्रममा केसीको निधन भएको पारिवारिक स्रोतले जानकारी दिएका हो ।
काठमाडौँको चावाहिल निवासी उनी झण्डै ६ महिनादेखि मुटुको समस्याबाट पीडित थिए । डेढ वर्षअघि केसीकी श्रीमतीको पनि निधन भएको थियो । दोलखामा जन्मिएका केसीले आफ्नै निजी लगानीमा दोलखाका दुर्गम क्षेत्रमा बाटो बनाउने जस्ता काम गरेर समाजसेवीको समेत भूमिका निर्वाह गरेका थिए । स्वास्थ्य समस्याका कारण पछिल्लो समय उनी राजनीतिमा सक्रिय हुन सकेका थिएनन् । केसीका एक छोरा र एक छोरी छन् ।
