देशभरका अतिक्रमित जग्गामा बनेका संरचना हटाउन ७७ वटै जिल्ला प्रशासन कार्यालयहरूमा सर्कुलर जारी
मतदानका दिन कुन-कुन सवारी साधन चल्न पाउँछन ?
वि.सं.२०८२ फागुन १४ बिहीवार ०८:४६
793
shares
shares
निर्वाचन आयोगले फागुन २१ गते हुने प्रतिनिधि सभा सदस्य निर्वाचनका दिन सवारी साधन सञ्चालन सम्बन्धमा आवश्यक निर्णय गरेको छ।
मतदानलाई शान्तिपूर्ण, मर्यादित र भयरहित वातावरणमा सम्पन्न गर्नका लागि आयोगले मतदानको दिन सार्वजनिक तथा निजी सवारी साधन सञ्चालनमा रोक लगाउने निर्णय गरेको छ। जसको कार्यान्वयका लागि आयोगले गृह मन्त्रालयलाई आवश्यक निर्देशन समेत दिइसकेको छ ।
आयोगको निर्णय अनुसार फागुन २० गते राति १२:०० बजेदेखि फागुन २१ गते साँझ मतदान कार्य सम्पन्न नभएसम्मका लागि अनुमति प्राप्त बाहेकका सबै प्रकारका सवारी साधनहरू चल्न पाउने छैनन्। तर, सर्वसाधारणको दैनिक जीवन र अत्यावश्यक सेवालाई ध्यानमा राख्दै आयोगले केही विशेष प्रकृतिका सवारी साधनहरूलाई भने निर्वाध रूपमा सञ्चालनको अनुमति दिएको छ।
अत्यावश्यक सेवाअन्तर्गत पर्ने एम्बुलेन्स, दमकल, शव वाहन, रक्तसञ्चार सेवाका सवारी साधन र सुरक्षा निकायका गाडीहरूलाई मतदानको दिन चल्न कुनै अवरोध हुने छैन। त्यसैगरी, विद्युत् मर्मत, खानेपानी तथा ढल मर्मत र दूरसञ्चार सेवा मर्मतका लागि प्रयोग हुने सवारी साधनहरू पनि सञ्चालन हुन पाउनेछन्। कूटनीतिक नियोगका सवारी साधनहरूलाई पनि आयोगले सञ्चालनको अनुमति दिएको छ।
हवाई मार्गबाट यात्रा गर्ने यात्रीहरूको सुविधाका लागि आयोगले विशेष व्यवस्था गरेको छ। मतदानको दिन अन्तर्राष्ट्रिय र आन्तरिक हवाई उडानहरू यथावत् सञ्चालन हुनेछन्। विमानस्थलसम्म जानुपर्ने वा विमानस्थलबाट घर वा होटलसम्म फर्कनुपर्ने यात्रीहरूले आफ्नो हवाई टिकट देखाएर निजी वा सम्बन्धित एयरलाइन्सले उपलब्ध गराएको सवारी साधन प्रयोग गर्न पाउनेछन्।
यसका अतिरिक्त पास प्राप्त गरेका सवारी साधनहरू पनि सञ्चालन हुन पाउनेछन्। सवारी पास वितरणलाई व्यवस्थित बनाउन निर्वाचन आयोग र जिल्ला प्रशासन कार्यालय काठमाडौँका प्रतिनिधिहरू सम्मिलित एक विशेष इकाइ आयोगको सचिवालयमा स्थापना गरिने भएको आयोगले बुधबार जारी गरेको विज्ञप्तिमा उल्लेख छ ।
