आजका लागि सुनको मूल्य प्रतितोला २ लाख ९५ हजार ७ सय रुपैयाँ
सुधाकर दलेला नेपालका लागि भारतीय राजदूतमा प्रस्तावित
वि.सं.२०८३ असोज २२ बिहीवार ०९:०६
208
shares
shares
भारतले सुधाकर दलेलालाई नेपालका लागि नयाँ राजदूतमा प्रस्ताव गरेको छ। उनी भारतको विदेश सेवाका अनुभवी वरिष्ठ कूटनीतिज्ञ हुन्। उनलाई नेपालको राजदूत नियुक्तिको लागि भारतले नेपालको परराष्ट्र मन्त्रालयमा ‘नोट भर्वल’ पठाएको परराष्ट्र स्रोतले जनाएको छ।
‘नोट भर्वल’ गृह मन्त्रालय हुँदै मन्त्रिपरिषदले स्वीकृत गरेको जानकारी दिएपछि भारतले राजदूत नियुक्तिका लागि एग्रिमो पठाउँछ।अहिले सुधाकर भारतीय विदेश मन्त्रालयमा आर्थिक सम्बन्ध सचिवको जिम्मेवारीमा छन्।सन् १९९३ मा भारतीय विदेश सेवामा प्रवेश गरेका सुधाकरले आफ्नो कूटनीतिक करिअर इजरायलको तेलअभिभबाट सुरु गरेका थिए। त्यसपछि उनले ब्रासिलिया, सिकागो, ढाका, जेनेभा, थिम्पु र वासिङ्टन डीसीस्थित भारतीय नियोगमा विभिन्न जिम्मेवारी सम्हालेका थिए।
सन् २०२२ देखि २०२५ सम्म भुटानका लागि भारतीय राजदूतको जिम्मेवारी सम्हालेका दलेलाले नयाँ दिल्लीस्थित प्रधानमन्त्री कार्यालयमा सन् २००९ देखि २०११ सम्म निर्देशकका रूपमा काम गरेका थिए।उक्त जिम्मेवारीमा उनले दक्षिण एसियाली छिमेकी, पूर्वी एसिया, इन्डो–प्यासिफिक क्षेत्र, खाडी, मध्यपूर्व र अफ्रिकी मुलुकसँग भारतको सम्बन्ध हेरेका थिए।नेपाल र भुटान मामिलाका अनुभवी हुन दलेला। उनले सन् २००६ मा भारतीय विदेश मन्त्रालयमा उत्तर विभागको निर्देशक र सन् २०१६ देखि २०१९ सम्म सोही विभागको सहसचिवका रूपमा काम गरेका थिए। उक्त विभागले नेपाल र भुटानसँग भारतको सम्बन्ध हेर्छ।
व्यापार तथा आर्थिक नीतिमा पनि उनको लामो अनुभव छ। उनले नयाँ दिल्लीस्थित वाणिज्य विभागमा व्यापार नीति निर्देशकका रूपमा काम गरिसकेका छन्। साथै विश्व व्यापार संगठन (डब्लूटीओ) मा रहेको भारतको स्थायी नियोगमा दुईपटक जिम्मेवारी सम्हालेका उनले सन् २०१४ देखि २०१६ सम्म भारतका डेपूटी स्थायी प्रतिनिधिका रूपमा काम गरेका थिए।त्यसबाहेक, दलेला वासिङ्टन डीसीस्थित भारतीय दूतावासमा सन् २०२० देखि २०२२ सम्म डेपुटी चिफ अफ मिसनका रूपमा कार्यरत थिए। उनले सन् २०२५ सेप्टेम्बर १ देखि भारतीय विदेश मन्त्रालयमा आर्थिक सम्बन्ध सचिवको जिम्मेवारी सम्हालिरहेका थिए।
यो भूमिकामा रहँदा उनले भारतको आर्थिक कूटनीति, ग्लोबल साउथका देशसँग विकास साझेदारी, अफ्रिकासँगको साझेदारी, बहुपक्षीय आर्थिक सम्बन्ध तथा नयाँ र उदाउँदा रणनीतिक प्रविधिसम्बन्धी विषय हेरिरहेका थिए।दलेला ब्रिक्स, आईबीएसए, भारत, इजरायल, यूएई र अमेरिका (आईटूयूटू)का लागि भारतको प्रतिनिधि समेत हुन्। परराष्ट्र सेवामा प्रवेश गर्नुअघि दलेलाले इलेक्ट्रोनिक्स इन्जिनियरिङमा स्नातक गरेका थिए।दलेला नेपालका लागि भारतको २७औँ राजदूत हुनेछन्।
यसअघि नेपालका लागि भारतीय राजदूत रहेका नवीन श्रीवास्तव आफ्नो कार्यकाल पूरा गरी भारत फर्किएका छन्। सन् २०२२ जुनमा नेपालका लागि २६औँ भारतीय राजदूतका रूपमा नियुक्त भएका श्रीवास्तव १ अक्टोबर २०२६ मा कार्यकाल पूरा गरेर स्वदेश फर्किएका हुन्।
