निजिक्षेत्रका संञ्चारमाध्यमलाई सरकारी विज्ञापन नदिने सरकारको निर्णय विरूद्धको रिटमा सक्कल निर्णय झिकाउने आदेश, सोमवार फेरि...
शेखर कोइराला गले, तालमेल गरेरै अघि बढन कार्यकतालाई दिए निर्देशन
वि.सं.२०७८ चैत २१ सोमवार १७:३८
598
shares
shares
नेपाली काँग्रेसका नेता डा.शेखर कोइरालाले स्थानीय तहमा आवश्यकता अनुसार चुनावी तालमेल गरेर अगाडि बढन कार्यकर्तालाई निर्देशन दिएका छन् । काँग्रेस गण्डकी प्रदेश द्वारा पोखरामा सोमबार आयोजित कार्यकर्ता भेटघाट कार्यक्रममा उनले चुनावी तालमेल गर्ने अधिकार प्रदेश, जिल्ला, नगर र वडालाई भएकाले आवश्यकता अनुसार निर्णय लिन कार्यकर्तालाई निर्देशन दिए ।
नेता कोइरालाले सक्षम र योग्य उम्मेदवारलाई निर्वाचनमा टिकट दिनुपर्ने बताए । कोइरालाले तालमेलका नाममा विगतमा चितवनको भरतपुर महानगरपालिकामा जस्तो तालमेल नगर्ने आग्रह गरे । कोइरालाले नयाँ मतदातालाई रुख बाहेक अन्य चिन्हमा मतदान गर्न लगाउने कुरा काँग्रेसका लागि चुनौती भएको वताए । उनले भने, ‘पहिलो पटक ३६ लाख मतदाताले मत दिँदैछन् । उनीहरूलाई हँसिया हथौडामा भोट हाल भन्यौं भने आमनिर्वाचन र त्यसपछिका चुनावमा रुखमा मत हाल भनेर कसरी भन्ने ? यो गम्भीर विषय हो ।’
तालमेल गर्ने कुरालाई खराब नभए पनि नयाँ मतदातालाई मध्यनजर गर्नुपर्ने उनको भनाइ छ । उनले भने, ‘एकातिर घरघर जाऔं काँग्रेस जिताऔँ भनेका छौं । अर्को तिर माओवादीलाई भोट हाल भनेका छौं । यो त मिलेन, व्यवस्थापन कसरी गर्ने । ” यस्तै काँग्रेस केन्द्रीय सदस्य मधु आर्चायले काँग्रेसको एजेन्डामा गएर अन्य दलहरु पनि चुनाव लडन तयार हुनुपर्ने बताए । काँग्रेस गण्डकी प्रदेशका सभापति शुक्रराज शर्माले काँग्रेसले स्थानीय तहमा उत्साह दिने किसिमको उम्मेदवार सिफारिस गर्दा उसैले टिकट पाउनुपर्ने बताए ।
सभापति शर्माले स्थानीय तहमा आवश्यकता अनुरुप मात्र तालमेल हुनसक्ने दावी गरे । नेता शर्माले घोषणा पत्रमा नैतिक शिक्षा, गुणस्तरीय शिक्षा र निशुल्क स्वास्थ्यलाई समेट्न जोड दिए । कार्यक्रमा काँग्रेस नेता जगदीशनरसिंह केसी, गण्डकी प्रदेशका उपसभापति कल्पना तिवारी, महामन्त्री किरणबाबु श्रेष्ठ लगायतले स्थानीय तहको चुनाव र तालमेल बारे धारणा राखेका थिए ।
