काठमाडौँ । प्रधानमन्त्री शेरबहादुर देउवाले आज निर्वाचन आयोगका पदाधिकारीहरुलाई बालुवाटारमा डाक्नुभएको छ । स्थानीय तहको निर्वाचनबारे छलफल गर्न आयोगका पदाधिकारीलाई बोलाइएको छ ।
दिउँसो ४ बजे प्रधानमन्त्री निवास, बालुवाटारमा छलफल बोलाइएको छ । सरकार स्थानीय तहको निर्वाचन मिति घोषणा गर्न संविधान र ऐनमा अस्पष्टता देखिएको भन्दै ऐन संशोधनको प्रक्रियामा लागेको छ । तर, विपक्षी एमालेले भने कुनै हालतमा आगामी बैशाखभित्र स्थानीय तहको निर्वाचन गर्नुपर्ने बताउँदै आएको छ । यता निर्वाचन आयोगले पनि पटक पटक निर्वाचन ऐेनबमोजम बैशाखमै निर्वाचन गर्नुपर्ने भन्दै सरकारमाथि मनोवैज्ञानिक दबाब दिँदै आएको छ ।
आज प्रधानमन्त्री र निर्वाचन आयोगका पदाधिकारीहरु बीच हुने छलफलले चुनाव कहिले हुन्छ भन्ने एकीन गर्न सकिने अवस्था देखिएको छ । आयोगले यस अघि पटक÷ पटक निर्वाचनको मिति तोक्न सरकारलाई आग्रह गरेपनि सरकारले वेवास्ता गर्दै आएको थियो । त्यहि कारण आज हुने भेटघाटलाई महत्वूर्ण मानिएको छ ।
