आजका लागि सुनको मूल्य प्रतितोला २ लाख ८० हजार ३ सय रुपैयाँ
राष्ट्रसङघीय सुरक्षा पोष्टको जिम्मेवारीमा नेपाली महिला सैनिक
वि.सं.२०८३ कात्तिक १२ बिहीवार १०:२२
403
shares
shares
काठमाडौँ, कात्तिक १२ गते । संयुक्त राष्ट्रसङ्घको विश्वकै अग्लो स्थायी रूपमा सञ्चालनमा रहेको सुरक्षा पोस्ट ‘हर्मोन होटेल’ को सुरक्षा जिम्मेवारी पहिलो पटक पूर्ण रूपमा नेपाली महिला शान्ति सैनिकले समालेका छन् ।
सन् २०२६ अक्टोबरको पहिलो साता नेपालका १३ जना महिला शान्ति सैनिकको टोलीले संयुक्त राष्ट्रसङ्घीय युद्धविराम पर्यवेक्षण बल (अनडफ) अन्तर्गत सिरियाको माउन्ट हर्मोनमा रहेको उक्त पोस्टको जिम्मेवारी औपचारिक रूपमा समालेका हुन् । सैनिक जनसम्पर्क तथा सूचना निर्देशनालयका अनुसार उक्त सुरक्षा पोस्ट समुद्री सतहबाट दुई हजार ८१४ मिटरको उचाइमा रहेको छ । जसमा पहिलो पटक पूर्ण महिला टोली परिचालन गरिएको छ । त्यहाँ खटिएको शान्ति सैनिक टोलीले निरन्तर निगरानी गर्ने, घटनाको पहिचान तथा प्रमाणीकरण गर्ने, प्रतिवेदन तयार पार्ने र गस्ती टोलीलाई सहयोग गर्नेलगायत महत्वपूर्ण जिम्मेवारी निर्वाह गरिरहेको जनाइएको छ । प्रतिकूल मौसम र चुनौतीपूर्ण भौगोलिक अवस्थामा पनि टोलीले आफ्नो जिम्मेवारी पूरा गरिरहेको भन्दै संयुक्त राष्ट्रसङ्घलगायतका निकायबाट उच्च प्रशंसा गरिएको छ । टोलीकी कमान्डर नेपाली सेनाका सहसेनानी (क्याप्टेन) सङ्गीता श्रेष्ठले यस अवसरलाई विश्वसामु महिला शान्ति सैनिकको क्षमता प्रदर्शन गर्ने महत्वपूर्ण अवसरका रूपमा लिएको बताउनुभयो । “महिला शान्ति सैनिकले के गर्न सक्छन् भन्ने कुरा विश्वलाई देखाउने अवसर पाएकामा म अत्यन्तै आभारी छु,” उहाँले भन्नुभयो ।
सैनिक मुख्यालय जङ्गी अड्डाका अनुसार हाल विभिन्न शान्ति मिसनमा २९७ महिला शान्ति सैनिक कार्यरत छन् । यो ‘कन्टिन्जेन्ट’ मा खटिएका नेपाली शान्ति सैनिकको कुल सङ्ख्याको ७.४५ प्रतिशत हो । नेपालले यसलाई १० प्रतिशतभन्दा बढी पुर्याउने लक्ष्य राखेको छ ।
