सञ्चार माध्यमका लागि नयाँ विज्ञापन नीति २०८३ चाडौ आँउछ: सञ्चार मन्त्री तिमिल्सिना
सञ्चार माध्यमका लागि नयाँ विज्ञापन नीति २०८३ चाडौ आँउछ: सञ्चार मन्त्री तिमिल्सिना
वि.सं.२०८३ वैशाख २५ शुक्रवार ०८:५०
286
shares
shares
काठमाडौं । सञ्चार तथा सूचना प्रविधिमन्त्री डा. विक्रम तिमिल्सिनाले सरकारले पत्रकारिता क्षेत्रमाथि कुनै प्रकारको नियन्त्रण वा अंकुश लगाउने नीति नलिएको बताएका छन् । उनले संविधानले सुनिश्चित गरेको प्रेस स्वतन्त्रताको संरक्षणप्रति सरकार प्रतिबद्ध रहेको स्पष्ट पारे ।
राष्ट्रिय पत्रकारिता दिवस–२०८३ का अवसरमा बिहीबार काठमाडौंमा आयोजित ‘राष्ट्रिय पत्रकारिता पुरस्कार तथा वरिष्ठ पत्रकार सम्मान’ कार्यक्रममा बोल्दै मन्त्री तिमिल्सिनाले लोकतन्त्रलाई बलियो बनाउन स्वतन्त्र र जिम्मेवार पत्रकारिताको भूमिका महत्वपूर्ण हुने बताए ।उनले प्रेस स्वतन्त्रता केवल अधिकार मात्र नभई जिम्मेवारी र उत्तरदायित्वसँग पनि जोडिएको उल्लेख गर्दै सत्य र तथ्यमा आधारित पत्रकारिताको आवश्यकता औँल्याए । समाजलाई सही दिशा दिन पत्रकारिताले विश्वसनीयता कायम राख्नुपर्ने उनको भनाइ थियो ।
मन्त्री तिमिल्सिनाले पछिल्लो समय सामाजिक सञ्जालमार्फत फैलिने भ्रामक सूचना र फेक न्यूजप्रति चिन्ता व्यक्त गरे । उनले तथ्य परीक्षण अर्थात् ‘फ्याक्ट चेक’ लाई आधुनिक पत्रकारिताको अनिवार्य अभ्यासका रूपमा विकास गर्नुपर्नेमा जोड दिए ।यस वर्षको राष्ट्रिय पत्रकारिता दिवसको नारा ‘सुशासनको आधार : प्रविधिमैत्री जिम्मेवार पत्रकार’ तय गरिएको जानकारी दिँदै उनले सुशासन प्रवर्द्धनमा जिम्मेवार सञ्चारमाध्यमको भूमिका अझ महत्वपूर्ण बन्दै गएको बताए ।
सूचना प्रविधिको तीव्र विस्तारले सञ्चार क्षेत्रलाई नयाँ अवसरसँगै चुनौती पनि थपेको उल्लेख गर्दै उनले डिजिटल युगमा पत्रकारिताको विश्वसनीयता जोगाउन प्रविधिको सही उपयोग आवश्यक रहेको धारणा राखे ।कार्यक्रममा मन्त्री तिमिल्सिनाले सञ्चारमाध्यमको आर्थिक दिगोपन र व्यावसायिक सुरक्षाका लागि सरकारले ‘विज्ञापन नीति–२०८३’ तयार गरिरहेको जानकारी पनि दिए । उक्त नीतिले छापा, रेडियो, टेलिभिजन तथा अनलाइन सञ्चारमाध्यमको हित संरक्षण गर्ने गरी व्यवस्था गरिने उनले बताए ।
