मेलम्ची खानेपानी आयोजनाको मर्मतसम्भार गरी यथाशीघ्र पानी ल्याउन माग गर्दै काठमाडौंबासी आन्दोलित भएका छन् । मेलम्ची खानेपानी संघर्ष समितिले तुरुन्त पानी खोल्न माग गर्दै आज कोटेश्वर चोक स्थित प्रहरी प्रभागअगाडि आन्दोलन गरेको हो । राष्ट्रिय प्रजातन्त्र पार्टीबाट बागमती प्रदेशसभा सदस्य सुनिल केसी र समितिका संयोजक गोविन्दराज पन्तको नेतृत्वमा भएको आन्दोलनमा झण्डै डेढसय जनाको सहभागिता रहेको छ ।
उनीहरुले ‘मेलम्चीको पानी छिटो खोल’,‘मेलम्ची पानी माथिको चलखेल बन्द गर’, लगायतका प्लेकार्ड बोकेर चर्को नाराबाजी गरेका छन् । मेलम्चीको पानी छिटोभन्दा छिटो उपलब्ध गराउन सरकारलाई दबाब दिनका लागि समिति गठन गरेर काठमाडौंबासीले निरन्तर आन्दोलन गरिरहेका छन् । करिब ६ महिनादेखि मेलम्ची अवरुद्ध हुँदापनि सरकारले मर्मतमा चासो नदिएपछि आक्रोशित बनेका काठमाडौंबासीले यसअघि अर्थमन्त्री डा. प्रकाशसरण महत र खानेपानीमन्त्री महिन्द्र राय यादवलाई भेटेर ज्ञापनपत्र बुझाएका थिए ।
