पूर्वराजा ज्ञानेन्द्र शाहले बाराको बरियारपुरमा रहेको प्रसिद्ध धार्मिक स्थल गढीमाई मन्दिरमा बिहीबार पूजापाठ गरेका छन्। पूर्वराजा शाहले बिहीबार साँझ गढीमाई मन्दिर पुगी पूजापाठ गरेको उनीनिकट स्रोतले जानकारी दिएका छन्। पूर्वराजाको सम्मानमा माघ १३ गते वीरगञ्जमा नागरिक अभिनन्दन गर्ने कार्यक्रम छ।
पूर्वराजा शाह केही दिनयता बारा, पर्सा, रौतहट र सर्लाहीको भ्रमणमा छन्। गढीमाई पुगेका पूर्वराजालाई स्थानीयले स्वागत गरेका थिए। स्थानीयहरुले पूर्वराजाका पक्षमा नाराबाजीसमेत गरेका थिए। स्थानीयहरुले ‘राजा आऊ देश बचाऊ’, ‘हाम्रो राजा हाम्रो देश प्राण भन्दा प्यारो छ’, ‘राजा कसको जनताको, जनता कसको राजाको’ लगायतका नाराहरू लगाएका थिए।
