यसपटकको निर्वाचनले राजनीतिक दलहरुको हैसियत नै नदेखिने

Abhiyan Weekly

वि.सं.२०७९ कात्तिक ३ बिहीवार १०:४६

572
shares

काठमाण्डौ । आगामी मंसिर ४ गते सम्पन्न हुने संघीय संसद र प्रदेशसभाको निर्वाचनका लागि साना ठुला सबै राजनीतिक दल र केही स्वतन्त्र उम्मेदवारहरु निर्वाचनका लागि सक्रिय भएका छन् । राजनीतिमा अनेक सम्भावनाहरु हुने भएपनि त्यो लोकतान्त्रिक परिपार्टी र संविधान ऐन कानुनको परिधिभित्रैबाट हुनुपर्ने अनिवार्य सर्त हो ।
पाँच दलीय गठबन्धन र त्यही गठबन्धनको सरकारले सविधानको रक्षाका लागि गठबन्धन बनाएर निर्वाचनमा जानुपर्ने बाध्यता रहेको बताइरहेको भएपनि त्यसमा कुनै सत्यता रहेको देखिँदैन । गठबन्धनको मुख्य उदेश्य भनेको जसरी भएपनि सत्ता हत्याउने खेल बाहेक अन्य केही देखिँदैन ।
राजनीतिक दलहरुका लागि आवधिक निर्वाचन सुवर्ण अवसर हो । आ आफ्नो राजनीतिक दललाई जनताबाट अनुमोदन गराउने सुवर्ण अवसरलाई राजनीतिक दलहरुले गुमाएका छन् ।
गठबन्धन गरेर दलहरु निर्वाचनमा गएका हुनाले कुन दलको जनाधार कति रहेछ र दलहरुको अवस्था र जनतामा दलहरुप्रति कति विश्वास रहेछ भनेर जनताले आफ्नो मत जाहेर गर्न नपाउने भएका छन् ।
सत्ता गठबन्धनले पाँच दलीय गठबन्धन गरेको र उसको एउटै उदेश्य नेकपा एमालेलाई घेराबन्दी गरेर उसलाई पराजित गर्न बाहेक गठबन्धनको अर्को कुनै मिसन देखिँदैन । सत्ता गठबन्धनमा रहेका दलहरुको सिद्धान्त, एक अर्कासँग मेल खाँदैन ।
नेपाली कांग्रेसजस्तो पुरानो पार्टी र लोकतन्त्रमा विश्वास राख्ने पार्टीले एक्लै निर्वाचनमा जाने आँट नगर्नु भनेको कांग्रेसप्रति जनताको विश्वास कम हुँदै जानु हो । त्यसैले उसले कम्युनिष्टहरु त्यसमा पनि उग्र विचार बोकेको माओवादी केन्द्रसँग गठबन्धन गर्नु भनेको सत्ता मोह बाहेक अन्य केही हुनै सक्दैन ।
गठबन्धनमा रहेको अर्को दल नेकपा एकीकृत समाजवादी पार्टी नेकपा एमालेबाट चोइटिएर निर्माण भएको पार्टी हो । त्यो पार्टीको जन्मदाता नेपाली कांग्रेसका सभापति एवं प्रधानमन्त्री शेरबहादुर देउवा नै हुन् ।
पाँच दलीय गठबन्धनको नेतृत्वको नेतृत्व गर्दै प्रधानमन्त्री भएका देउवाले राजनीतिक दल विभाजन सम्बन्धी अध्यादेश ल्याएर नेकपा एमालेलाई विभाजन गराई दिएका थिए । त्यही कारणले गर्दा नेकपा एकीकृत समाजवादी पार्टीका अध्यक्ष हुन पाएका माधव नेपालले आफूलाई अध्यक्ष बनाईदिएको गुण तिर्न कांग्रेससँग जस्तोसुकै सहमति र सम्झौता गर्न तयार रहेका छन् ।
नेकपा एमालेको नेतृत्व गरिसकेका माधव नेपाल यसरी कांग्रेसको पुच्छर समातेर आफ्नो राजनीतिक उदेश्य पूरा गर्न लागिरहेका भएपनि त्यसका लागि माओवादी केन्द्रका अध्यक्ष पुष्पकमल दाहाल बाधक बन्ने प्रायः निश्चित जस्तै देखिएको छ ।
नेकपा एमालेले समेत निर्वाचनका लागि केही साना दलहरुसँग सिमित क्षेत्रमा तालमेल गरेको छ । प्रतिनिधिसभाको प्रत्यक्षतर्फ १ सय ६५ क्षेत्र मध्येको २४ क्षेत्रमा एमालेले तालमेल गरेको छ ।
गठबन्धनकारी दलहरु एक्लाएक्लै निर्वाचनमा गएको खण्डमा एमालेसँग पराजित हुनुपर्ने भएकाले गठबन्धन गर्नु परेको उद्घोष प्रधानमन्त्री देउवाले पटक पटक गरिकसकेका हुनाले प्रष्ट हुन्छ एमालेसँग गठबन्धन कति डराएको रहेछ भनेर ।
जनताको विश्वास जित्नुको बदला जनताले आफूले रोजेको व्यक्ति र दललाई मत हाल्न पाउने अधिकार समेत दलहरुले खोसेका हुनाले यस पटकको निर्वाचनले राजनीतिक दलहरुको जनाधार कति रहेछ भन्ने प्रष्ट नहुने निश्चित जस्तै भएको छ ।
जनताको अधिकार खोसेर संविधान बचाउने नाममा फेरी गठबन्धनले जनतालाई झुक्याउने र आफ्नो राजनीतिक उदेश्य पूरा गर्ने मनसाय राखेको प्रष्ट भएको छ ।

प्रकाशित मिति / समय : वि.सं.२०७९ कात्तिक ३ बिहीवार १०:४६