तीन डिग्री घट्यो आज बिहान उपत्यकाको न्यूनतम तापक्रम
वि.सं.२०८३ मंसिर १ मंगलवार ०९:११
shares

काठमाडौँ उपत्यकाको न्यूनतम तापक्रम घटेको छ। हिजोको तुलनामा आज काठमाडौँ उपत्यकाको न्यूनतम तापक्रम करिब ३ डिग्री कम भएको हो।
मौसम पूर्वानुमान महाशाखाका मौसमविद् रोजन लामिछानेका अनुसार आज (मंगलबार) बिहान ५:४५ बजे काठमाडौँ उपत्यकाको न्यूनतम तापक्रम ८.८ डिग्री सेल्सियस देखिएको हो। हिजो सोमबार यो बेला १२.४ डिग्री सेल्सियस देखिएको थियो।यद्यपि पछि बिहान ८:४५ बजेको अन्तिम मापनमा काठमाडौँ उपत्यकाको न्यूनतम तापक्रम ११.५ डिग्री सेल्सियस कायम भएको थियो।
आजको पनि वास्तविक न्यूनतम तापक्रम त्यही समय पुन: मापन गरिनेछ। त्यसबेला काठमाडौँ उपत्यकाको न्यूनतम तापक्रम थोरै अरू घट्ने सम्भावना हुन्छ। तर कहिलेकाहीँ सुरुवातकै कायम रहन पनि सक्छ।मौसमविद्का अनुसार राति आकाश बादलले ढाक्दा बिहान न्यूनतम तापक्रम बढ्छ भने रातभर आकाश खुला रहँदा घट्छ।मौसम पूर्वानुमान महाशाखाले हरेक दिन काठमाडौँ उपत्यकासहित देशका विभिन्न स्थानका न्यूनतम र अधिकतम तापक्रम मापन गर्छ।
न्यूनतम बिहान ८:४५ बजे र अधिकतम तापक्रम साँझ ५:४५ बजे मापन गरिन्छ।मौसमविद्का अनुसार न्यूनतम (मिनिमम) तापक्रमले रातिदेखि बिहानसम्मको तापक्रम बताउँछ भने अधिकतम (म्याक्सिमम) तापक्रमले दिनभरको तापक्रमको अवस्था जनाउँछ।


































