काठमाडौं ।वायु सेवा सन्चालक संघले बुधबार देखि आन्तरिक उडान अनिश्चितकालका लागि बन्द गर्ने निर्णय फिर्ता लिएको छ । हवाई सेवा कम्पनीहरुले आज बिहान ११ बजे बाट आन्तरिक उडान नियमित हुने जानकारी दिएका छन् । बुद्ध एयरले ट्वीट गरेर बुधबार बिहान ११ बजेदेखि उडानहरु सुचारु हुने जानकारी दिएको छ ।
यती एयरलाइन्सले पनि ट्वीट गरेर अनिश्चितकालका लागि स्थगित भएका सम्पूर्ण उडानहरु नियमित हुने जानकारी दिएको छ । श्री एयरलाइन्सका अनिल मानन्धरले पनि आज बिहान ११ बजेदेखि हवाई उडान नियमित हुने बताए । ‘हेलिकोप्टर त बिहानै देखि अपरेसनमै छ, हवाईजहाज भने ११ बजे देखि नियमित सेवामा हुन्छ,’ उनले भने ।
वायु सेवा सन्चालक संघले विभिन्न मागहरु राख्दै बुधबार देखि अनिश्चितकालका लागि आन्तरिक उडान रोक्ने निर्णय गरेको थियो । त्यस लगत्तै नेपाल नागरिक उड्डयन प्राधिकरण र वायु सेवा सन्चालकहरु बीच वार्ता भएको थियो । गृहमन्त्रालयको समन्वयमा भएको वार्तामा उडान रोक्ने निर्णय बाट वायु सेवा सन्चालक पछि हटेका थिए ।
वायु सेवा सन्चालक संघका प्रवक्ता योगराज कँडेलले प्राधिकरण सँगको वार्तामा बुधबार बिहान ११ बजे देखि उडान सुरु गर्ने र आफूहरुका मागको विषयमा छलफल पनि जारी राख्ने सहमति भएको बताए ।