विष्णु पौडेललाई म्याद थपका लागि विशेष अदालतमा पेस गरियो
नेपाल टेलिकमले लिज लाईनको महसुल दरमा ३६ प्रतिशत घटायो
वि.सं.२०७९ असार ९ बिहीवार १५:४९
585
shares
shares
काठमाडौं। नेपाल टेलिकमले इन्टरनेट तथा इन्ट्रानेट दुवै लिज लाइनको महशुल ३६ प्रतिशतले घटाएर शुल्क निर्धारण गरेको छ। टेलिकमले उपलब्ध गराइरहेको लिज कनेक्टिभिटीको नयाँ महशुल असार १ देखि लागू हुनेगरी नयाँ दर तय गरेको छ।
इन्टरनेट लिज लाइन अन्तर्गत १ देखि २० एमबीपीएस ब्यान्डविथको महशुल दर पहिले प्रति एमबीपीएस २५ सय रुपैयाँ रहेकोमा घटाएर प्रति एमबीपीएस १६ सय रुपैयाँ तोकेको छ। त्यसैगरी २१ देखि ५० एमबीपीएसको महशुल दर प्रति एमबीपीएस २३ सय रुपैयाँ बाट घटाएर प्रति एमबीपीएस १६ सय रुपैयाँ नै कायम गरिएको टेलिकमले जनाएको छ।
५१ देखि १०० एमबीपीएस र १०० एमबीपीएस ब्यान्डविथ भन्दा बढी क्षमताको महशुल क्रमशः प्रति एमबीपीएस २१ सय रुपैयाँ र प्रति एमबीपीएस १९ सय रुपैयाँ रहेकोमा अब दुवैको महशुल दर प्रति एमबीपीएस १५ सय रुपैयाँ कायम गरिएको टेलिकमले जनाएको छ।
इन्ट्रानेट लिज लाइन अन्तर्गत १ देखि १० एमबीपीएस ब्यान्डविथको महशुल प्रति एमबीपीएस २७ सय रुपैयाँ रहेकोमा अब प्रति एमबीपीएस २४ सय रुपैयाँ, ११ देखि १०० एमबीपीएसको प्रति एमबीपीएस २४ सय रुपैयाँ रहेकोमा अब प्रति एमबीपीएस २१ सय रुपैयाँ र १०० एमबीपीएस भन्दा बढीको प्रति एमबीपीएस २१ सय रुपैयाँ रहेकोमा अब प्रति एमबीपीएस १८ सय रुपैयाँ तोकेको टेलिकमले जनाएको छ।
