रूपन्देहीमा तिनाउको बाढीले बगायो ५ वटा घर
बिहार विधानसभा निर्वाचनको मतगणना जारी, सत्ता गठबन्धन ‘एनडीए’ नै दुई तिहाइभन्दा बढी सिटमा विजयी हुन सक्ने
वि.सं.२०८२ कात्तिक २८ शुक्रवार १६:३३
1.24K
shares
shares
पटना । भारतको बिहार विधानसभा निर्वाचनको मतगणना जारी छ । अपराह्न चार बजेसम्मको मत परिणाम अनुसार त्यहाँको वर्तमान सत्ता गठबन्धन ‘एनडीए’ नै दुई तिहाइभन्दा बढी सिटमा विजयी हुने देखिएको छ ।
केन्द्र सरकारको नेतृत्वमा रहेको भारतीय जनता पार्टी (भाजपा) सहित बिहारका वर्तमान मुख्यमन्त्री नीतीशकुमार नेतृत्वको जनता दल युनाइटेड (जेडीयु) सम्मिलित गठबन्धन प्रचण्ड बहुमततर्फ अग्रसर देखिन्छ । यो गठबन्धनमा अन्य तीन साना दल पनि छन्, जसले जारी मतगणनामा करिब ३० सिटमा अग्रता बनाएका छन् ।समग्रमा एनडीए गठबन्धन कुल २४३ सिटमध्ये २०६ सिटमा अग्रता बनाएको छ भने दुई सिटमा विजयी घोषित भइसकेको छ । यही आधारमा एनडीए गठबन्धनले समग्रमा २०८ सिट जितेको खण्डमा बिहारमा अब भाजपा बाहेकको सरकार बन्न नसक्ने देखिएको छ ।
बिहार विधानसभामा भाजपा सबैभन्दा ठुलो दलका रूपमा स्थापित हुने देखिएको छ । जारी मतगणनामा भाजपाले ९६ सिटमा अग्रता बनाएको छ । दोस्रो स्थानमा उसकै गठबन्धनको सहयोगी घटक जेडीयुले चार सिटमा जित र ८१ सिटमा अग्रता बनाएको छ । जेडीयुले विधानसभामा ८५ सिट नै जितेको खण्डमा पनि अब उसले भाजपालाई बाहिर राखेर सरकार गठन गर्न नसक्ने अवस्था देखिन्छ ।बिहार विधानसभामा बहुमतका लागि कम्तीमा १२२ सिट आवश्यक हुन्छ । जेडीयुले भाजपालाई बाहिर राख्न खोजेको अवस्थामा उसलाई बहुमत जुटाउन कठिन हुने देखिएको छ । किनकि एनडीए गठबन्धनमा सामेल अन्य दलसँग २८ सिट हुने देखिन्छ । ती दल एनडीए गठबन्धनबाट अलग हुने सम्भावना निकै कम रहन्छ । किनकि भाजपा र एनडीए गठबन्धनका बाँकी तीन दल मिलेर बिहारमा सहजै सरकार गठन गर्न सक्ने अवस्था देखिन्छ ।
यद्यपि एनडीएले गठबन्धनभित्र जुन दलको जति सिट आए पनि आफूले सरकार बनाउने अवसर प्राप्त गरेमा जेडीयूकै नेता नीतीशकुमारलाई नै मुख्यमन्त्री बनाउने घोषणा गरिसकेको छ । त्यसैले भाजपा ठुलो दल भए पनि उसले सरकारको नेतृत्वमा दाबी नगर्ने निश्चितजस्तै छ । यद्यपि, विगतमा नीतीशकुमारले गठबन्धनबाट बाहिरिएर सरकार बनाएका कारण उनी एउटै गठबन्धनमा टिकिरहन नसक्ने नेताका रूपमा पनि परिचित छन् । तर अहिले विधानसभाको समीकरणले उनलाई अब त्यसरी अर्को गठबन्धनमा जान वा भाजपालाई बाहिर राखेर सरकार बनाउन भने कठिन देखिन्छ ।
