कञ्चनपुरको शुक्लाफाँटा नगरपालिकाको मेयरमा एमालेका रणबहादुर महरा निर्वाचित
वि.सं.२०७९ जेठ ८ आइतवार १४:२२
shares

महेन्द्रनगर ।कञ्चनपुरको शुक्लाफाँटा नगरपालिकाको मेयरमा नेकपा एमालेका रणबहादुर महरा निर्वाचित भएका छन् ।
प्रतिस्पर्धी नेपाली कांग्रेसका चिन्तामणि भट्ट र नेकपा माओवादीका नवराज ऐरलाई पराजित गर्दै महरा मेयरमा निर्वाचित भएका हुन् । महराले ६ हजार ७७३ मत पाउँदा उनका प्रतिस्पर्धी कांग्रेसका भट्टले ६ हजार २६४ र माओवादीका ऐरले ५ हजार २२५ प्राप्त गरेका छन् ।
यसैगरी उपमेयरमा नेपाली कांग्रेसकी कल्पना पन्त निर्वाचित भएकी छन् । उनले ६ हजार ५१९ मत प्राप्त गरिन् । उनकी प्रतिस्पर्धी नेकपा एकीकृत समाजवादीका माधवप्रसाद पन्तले ५ हजार ३६० र एमालेकी मोनिका भट्टले ५ हजार २३६ मत प्राप्त गरिन् ।
नवनिर्वाचित मेयर महराले शुक्लाफाँटालाई समृद्ध र नमूना नगर बनाउने घोषणा गरेका छन् । ‘सुन्दर नगर बनाउने सपना बोकेर हिँडेका छौं, नमूना नगर बनाउने हामी सँग भिजन छ,’ उनले भने, ‘गरिब, पिछडिएका बर्गका लागि हामी काम गर्ने छौं ।’ उनले प्रत्येक वडामा प्राविधिक खटाउने र कृषिमा लगानी बढाउने बताएका छन् ।





































