एनपीएल : चितवनलाई पराजित गर्दै काठमाडौ शिर्षस्थानमा उक्लियो
चिनियाँ कम्युनिस्ट पार्टीका केन्द्रीय कमिटीका राजनीतिक ब्यूरो सदस्य युआन च्याच्युन नेतृत्वको टोली र उपप्रधानमन्त्री श्रेष्ठ सहितको टोली बीच छलफल
वि.सं.२०८० साउन ८ सोमवार ०६:५४
923
shares
shares
काठमाडौँ । नेपाल भ्रमणमा रहेको चिनियाँ प्रतिनिधिमण्डलले नेकपा (माओवादी केन्द्र) का पदाधिकारीहरू सँग हिजो आइतबार साँझ छलफल गरेको छ । द्वारिका होटलमा भएको छलफलमा चिनियाँ कम्युनिस्ट पार्टीका केन्द्रीय कमिटीका राजनीतिक ब्यूरो सदस्य युआन च्याच्युन नेतृत्वको टोलीले माओवादी केन्द्रका कार्यवाहक अध्यक्ष तथा उपप्रधानमन्त्री नारायणकाजी श्रेष्ठ सहितको टोलीसँग छलफल गरेको हो ।
उपमहासचिव वर्षमान पुनका अनुसार आजको छलफल दुई पार्टी बीचको सम्बन्ध विस्तार गर्ने विषयमा केन्द्रित रहेको थियो । त्यस्तै, नेपाल र चीन बीच रहँदै आएको सरकार, पार्टी र जनस्तरको तीन तहको सम्बन्धलाई थप सुदृढ बनाउने विषयमा पनि आज छलफल भएको नेता पुनले रातोपाटीलाई जानकारी दिए ।उनले भने, ‘नेपालको सामाजिक आर्थिक विकासमा चीनले निरन्तर सहयोग गर्दै आएको छ । हामीले विभिन्न तहमा हुने आदानप्रदान निरन्तर चलिराख्नेछ भन्ने कुरा राख्यौँ । उहाँहरूबाट पनि हामी सकारात्मक प्रतिक्रिया पाएका छौँ ।’
त्यस्तै, युआन च्याच्युनले चिनियाँ कम्युनिस्ट पार्टी नेपालको शान्ति र समृद्धि स्थिरताको लागि पूर्ण सहयोग गर्न तयार रहेको बताएका थिए । उनले दुई देशबीचको मैत्रीपूर्ण सम्बन्ध सधैँ सुदृढ रहेको र प्रधानमन्त्री पुष्पकमल दाहाल ‘प्रचण्ड’ को आगामी दिनमा हुने चीनको भ्रमणले यसलाई अझै सुदृढ बनाउने आशा व्यक्त गरेका थिए । पछिल्लो समय चिनियाँ नेतृत्वले नेपालका कम्युनिस्ट पार्टीहरूलाई एकजुट हुन सुझाव दिँदै आएका छन् । तर, हिजोको भेटमा भने यस विषयमा कुनै छलफल नभएको नेता पुनको भनाई छ ।
‘ हिजोको भेटघाटमा दुई पार्टी बीचको सम्बन्ध विस्तारमा नै केन्द्रित रह्यो । उहाँहरूले हामी सँग मात्र नभएर देशका अन्य राजनीतिक दलहरू सँग पनि सम्बन्ध विस्तार गर्न चाहनुभएको छ,’ नेता पुनले भने, ‘उहाँहरूले नेकपा एमाले र नेपाली कांग्रेसको नेतृत्व सँग पनि छलफल गर्ने कार्यतालिका रहेको छ ।’ चिनियाँ प्रतिनिधिमण्डलले राष्ट्रपति रामचन्द्र पौडेलसँग भेटवार्ता गरेको थियो भने इटालीको भ्रमणमा रहेका प्रधानमन्त्री दाहालसँग भर्चुअल संवाद गरेको थियो ।
