नेपाली काँग्रेसमा निर्वाचनका बेला टिकट बाडँने अधिकार निर्वाचन ब्युरोलाई दिईने

Abhiyan Weekly

वि.सं.२०८३ असोज १९ सोमवार १८:१९

221
shares

काठमाडौं । नेपाली कांग्रेसले स्थानीय तह, प्रदेश तथा प्रतिनिधिसभा सदस्यको निर्वाचनमा टिकट वितरणका लागि नयाँ संरचना बनाउने भएको छ ।

सभापति गगनकुमार थापाले पार्टीको १५औँ महाधिवेशनको बन्दसत्रमा प्रस्तुत गरेको प्रतिवेदनमा निर्वाचन ब्युरोको परिकल्पना गरिएको छ । ब्युरोले निर्वाचन लड्ने उमेदवारहरूलाई टिकट दिने थापाले बताएका छन् ।राजनीतिक प्रस्ताव प्रस्तुत गर्दै थापाले भने, “योभन्दा पहिला टिकट कसरी दिइन्थ्यो, त्यतातिर नजाउँ । अब, त्यस्तो हुँदैन । ७५३ स्थानीय तहमा एक सय बढीमा महिलालाई प्रमुख पदमा उठाउँछौँ ।”

उनले पैसाले टिकट किन्ने कुरा पनि रोकिने बताए । “पैसाले टिकट किन्ने कुरा पूर्ण रूपमा रोक्छौँ । टिकट लिन एक रुपैयाँ लाग्दैन,” थापाले भने, “क्रियाशील सदस्यहरूको विवरण हाम्रो प्रणालीमा छ । हामीले अध्यावधिक गर्दा, टिकट वितरणमा आन्तरिक मतदान हुन्छ ।”नेपाली कांग्रेसबाट स्थानीय तहमा उमेदवारी दिनेहरूले पार्टीका क्रियाशील सदस्य तथा शुभचिन्तकबाट सुरुमै अनुबन्धित हुनुपर्ने भएको छ । निर्वाचन ब्युरोले उमेदवारीको पहिचान र निर्वाचनसँग सम्बन्धित तयारी गर्ने थापाले बताएका छन् ।

नेपाली कांग्रेसबाट विजयी जनप्रतिनिधिहरूलाई नीति तथा बजेट निर्माणमा सहयोग गरिने भएको छ । थापाको राजनीतिक प्रतिवेदनमा ‘गभर्नेन्स इन्स्टिच्युट’को परिकल्पना गरिएको छ ।नेतृत्व क्षमता विकासका लागि नेतृत्व प्रतिष्ठान, नीतिगत विकल्प तयारीका लागि नीति प्रतिष्ठान गठन गरिने थापाले बताए । जनप्रतिनिधिहरूलाई नीति, बजेट र सेवामा सहयोग गर्न गभर्नेन्स इन्स्टिच्युट गठन गरिने प्रतिवेदनमा उल्लेख गरिएको छ ।

गभर्नेन्स इन्स्टिच्युटले सरकारमा रहँदा प्रोजेक्ट गभर्नमेन्टअन्तर्गत प्राथमिकता, कार्यक्रम र कार्यसम्पादनको तयारी तथा अनुमान गर्नेछ ।प्रतिपक्षमा रहेको समयमा विधायन, सरकारी नीति र खर्चको परीक्षा, नागरिक प्रश्न तथा वैकल्पिक प्रस्तावमा सहयोग गर्ने उल्लेख गरिएको छ । अध्ययन, तयारी, कार्यान्वयनको समीक्षा र क्षमता विकासमा निरन्तर सहयोग गर्ने थापाको प्रतिवेदनमा भनिएको छ ।

नेपाली कांग्रेसका कियाशील सदस्य नभएका व्याक्तिले पनि आफ्नो अनुभव, प्रश्न वा सुझाव राख्न भौतिक र डिजिटल नागरिक संवाद मञ्च निर्माण गर्ने थापाको प्रतिवेदनमा भनिएको छ ।प्रतिवेदनमा नीति प्रतिष्ठान, गभर्नेन्स इन्स्टिच्युट र नेतृत्व प्रतिष्ठानसँग मञ्चलाई जोड्ने उल्लेख छ ।

कांग्रेसले आन्तरिक मतदानबाट उमेदवार छनौट, नागरिकका प्रश्न, सदस्यता, बैठक, निर्णय, कार्यक्रम वित्त, परामर्श र मूल्यांकनलगायत विषयमा डिजिटलमा जोड दिने भएको छ । १५औँ महाधिवेशनमा सभापति थापाले प्रस्तुत गरेको प्रतिवेदनमा डिजिटल प्रणाली विकास गर्ने भनिएको छ । व्यक्तिगत सूचनाको सुरक्षा र डिजिटल पहुँचमा नभएकाहरूलाई समेत समान विकल्प दिने भनिएको छ ।

प्रविधिले प्रक्रिया सरल र जिम्मेवारी स्पष्ट बनाउने र निर्णय उत्तरदायित्व सम्बन्धित निकायमै रहने भनिएको छ ।

प्रकाशित मिति / समय : वि.सं.२०८३ असोज १९ सोमवार १८:१९