कर्मचारीलाई १५ दिनमै तलब दिन सुरू
नेपालले आज ग्लोवल क्वालिफायरका लागि ओमान सग खेल्ने
वि.सं.२०७८ फागुन ६ शुक्रवार ०८:५४
481
shares
shares
आईसीसी टी-२० विश्वकप ग्लोबल क्वालिफायर ए आजदेखि ओमानमा सुरु हुँदैछ । उदघाटन खेलमै नेपालले घरेलु टोली ओमानसँग खेल्दै छ ।
समूह ‘ए’ मा रहेको र नेपाल र ओमानबीचको खेल बिहान ११ः४५ बजे अल अमरेतस्थित ओमान क्रिकेट एकेडेमी ग्राउण्डमा सुरु हुनेछ । ग्लोबल क्वालिफायर ए मा ८ टिमले प्रतिस्पर्धा गर्नेछन् । टिमलाई दुई समूहमा विभाजन गरिएको छ । नेपाल र ओमान सहित क्यानडा र फिलिपिन्स समूह ‘ए’ मा छन् ।
क्वालिफायर ए बाट शीर्ष दुई टिम मात्र अक्टोबर–नोभेम्बरमा अष्ट्रेलियामा हुने विश्वकपमा छनोट हुनेछन् । त्यसैले दोस्रो पटक टी–२० विश्वकपमा छनोट हुने लक्ष्य सहित ओमान पुगेको नेपालका लागि हरेक खेल महत्वपूर्ण छ ।
क्वालिफायर अघि नेपालले ओमानमै चारदेशीय टी–२० सिरिज खेल्दै तयारी समेत गरेको थियो । जसमा नेपालले पहिलो खेलमा ओमानलाई नै पराजित गरेको थियो । युएई र आयरल्याण्डसँग भने नेपाल पराजित भएको थियो । उक्त सिरिजमा नेपालले सकेसम्म सबैलाई अवसर दिंदै सही टिम छान्ने अवसरको रुपमा लिएको थियो । युवा कप्तान सन्दीप लामिछानेले नेपाल विश्वकपमा छनोट हुने सम्भावना रहेको र विश्वकप खेल्नु सपना रहेको बताएका छन् ।
प्रशिक्षक पुबुदु दासानायकेले टिम राम्रो अवस्थामा रहेको र विश्वकपमा छनोट हुने आत्मविश्वास रहेको बताएका छन् । ओमानका कप्तान जिसानद मक्सुदले चारदेशीय सिरिजको अन्तिम खेलमा युएईलाई हराएपछि टिम मोटिभेट भएको बताएका छन् ।
नेपालबाट १७ खेलाडीको टिम ओमान गए पनि तीन खेलाडीलाई रिजर्भमा राख्दै ग्लोबल क्वालिफायरका लागि १४ खेलाडीको टोली घोषणा गरिएको छ । कुशल मल्ल, शाहब आलम र प्रदीप ऐरी रिजर्भमा छन् । यस्तै चोटका कारण करण केसीको स्थानमा गुलशन झालाई टिममा राखिएको छ ।
यस पटक टिममा धेरै युवा र नयाँ खेलाडी छन् । लोकेश बम, विवेक यादव र सागर ढकालले ओमानमै पुगेर डेब्यु गरे । गुलशनले टी–२० आईमा डेब्यु गर्न बाँकी छ । अहिले मुख्य सदस्यको रुपमा रहेका कुशल भुर्तेल, आसिफ शेख, कमल सिंह ऐरीले गत बैशाखमा नेपालमा भएको त्रिकोणात्मक सिरिजमार्फत टी–२०आईमा डेब्यु गरेका हुन् ।
सिनियर खेलाडीको रुपमा पूर्व कप्तान ज्ञानेन्द्र मल्ल, शरद भेषावकर र जितेन्द्र मुखिया छन् । तीनै खेलाडीले सन् २०१४ मा बंगलादेशमा टी–२० विश्वकप खेलेका थिए । शरद २०१९ पछि र जितेन्द्र ७ वर्षपछि राष्ट्रिय टिममा पुनरागमन भएका हुन् ।
यस बाहेक कप्तान सन्दीप लामिछाने, दीपेन्द्रसिंह ऐरी, आरिफ शेख र अविनाश बोहरा नियमित खेलिरहेका खेलाडी छन् । आजै क्यानडा र फिलिपिन्सबीचको खेल पनि ११ः४५ बजे नै सुरु हुनेछ । यस्तै समूह ‘बी’ मा रहेका आयरल्याण्ड र युएई तथा जर्मनी र बहराइनबीचको खेल पनि आजै ३ः४५ बजे सुरु हुनेछ ।
दुवै समूहको शीर्ष दुई टोली सेमिफाइनल प्रवेश गर्नेछन् । सेमिफाइनल जित्दै फाइनल पुग्ने दुई टिम टी–२० विश्वकपमा छनोट हुनेछन् ।
