युद्ध रोक्ने इरानी प्रस्ताव ट्रम्पद्धारा फेरी अस्वीकार
मतपत्रको पहिलो नम्वरमा एमालेको सूर्य चिह्न रहने
वि.सं.२०८२ मंसिर ११ बिहीवार १२:२५
1.73K
shares
shares
काठमाडौ । आगामी फागुन २१ गते हुने भनिएको प्रतिनिधिसभाको निर्वाचनमा मतपत्र कुन दलको कहाँ पर्छ भन्नेमा सबैको चासो रहेको छ । तर कसको निर्वाचन चिह्न कहाँ भन्ने विषयमा निर्वाचन आयोगको निर्देशिकामा स्पष्ट व्यवस्था गरिएकोले सोही निर्देशिका अनुसार निर्वाचन चिह्न रहने निश्चित जस्तै रहेको छ ।
प्रतिनिधिसभा तथा प्रदेशसभा निर्वाचन निर्देशिकामा स्पष्ट व्यवस्था भएअनुसार र २०७९ को समानुपातिक तर्फको मत परिणामका आधारमा आगामी निर्वाचनको मतपत्रको क्रमसंख्या हुने पक्कापक्की रहेको छ । निर्देशिकाको दफा ४७ ले मतपत्र दलगत र स्वतन्त्र उम्मेदवारको चिह्न कसरी राखिन्छ भन्ने स्पष्ट व्यवस्था गरेकोले सोही निर्देशिका अनुसार हुने र तत्कालिन प्रतिनिधिसभामा प्रतिनिधित्व गर्ने दलहरुको चिह्न पहिले मतको क्रममा राखिने निश्चित रहेको छ ।
निर्देशिकाको दफा ४४ को उपदफा (१) क अनुसार आगामी फागुन २१ गते हुने भनिएको प्रतिनिधिसभा निर्वाचनमा २०७९ सालमा निर्वाचनमा भाग लिएका दलको हकमा त्यति बेला समानुपातिक तर्फ प्राप्त गरेको मत प्राप्त संख्याको आधारमा राखिनेछ । जसले वा जुन दलले समानुपातिकमा बढी मत प्राप्त गरेको थियो उक्त दलको निर्वाचान चिह्न पहिला नम्वरमा र त्यसपछि क्रमश पाउने दलहरुको निर्वाचन चिह्न राखिनेछ ।
जसमा पहिलो नम्वरमा नेकपा एमालेको सूर्य चिह्न रहने, दोस्रोमा कांग्रेसको रुख रहनेछ । २०७९ को निर्वाचनमा एमालेले २८ लाख ४५ हजार ६४१ मत प्राप्त गरेको थियो भने कांग्रेसले २७ लाख १५ हजार २२५ मत प्राप्त गरेको थियो ।
तेस्रोमा नेपाली कम्युनिष्ट पार्टीको तारा चिह्न रहनेछ । तत्कालीन नेकपा माओवादी केन्द्र र नेकपा एकीकृत समाजवादी दुवैले प्राप्त गरेको मत परिणाम जोड्दा १४ लाख ७४ हजार ७५ मत हुन्छ ।
चौथोमा रास्वपा रहनेछ उसले गत निर्वाचनमा ११ लाख ३० हजार ३३४ मत पाएको थियो भने पाचौँमा राप्रपाले ५ लाख ८८ हजार ८४९ मत प्राप्त गरेको थियो । पहिलो निर्वाचनमा भाग नलिएका दलहरुको निर्वाचन चिह्न दल दर्ता प्रयोग गर्नको लागि दल दर्ता गराएको नम्वरमा आधारमा मतपत्रमा उक्त पार्टीका निर्वाचन चिह्न नेपाली अक्षरको वर्णनाक्रम अनुसार हुनेछ ।
