निजिक्षेत्रका संञ्चारमाध्यमलाई सरकारी विज्ञापन नदिने सरकारको निर्णय विरूद्धको रिटमा सक्कल निर्णय झिकाउने आदेश, सोमवार फेरि...
निर्वाचन शान्तिपूर्ण रूपमा सम्पन्न हुनलाई नेपाली जनता, संविधान र राष्ट्रकै ऐतिहासिक जित : प्रधानमन्त्री कार्की
वि.सं.२०८२ फागुन २४ आइतवार १४:५९
2.07K
shares
shares
काठमाडौँ । प्रधानमन्त्री सुशीला कार्कीले प्रतिनिधिसभाको निर्वाचन शान्तिपूर्ण रूपमा सम्पन्न हुनुलाई नेपाली जनता, संविधान र राष्ट्रकै ऐतिहासिक जितका रूपमा व्याख्या गरेकी छिन्।
११६ औँ अन्तर्राष्ट्रिय महिला दिवसका अवसरमा आइतबार सिंहदरबारमा आयोजित विशेष कार्यक्रमलाई सम्बोधन गर्दै उनले कठिन र विशेष परिस्थितिमा पनि सफलतापूर्वक निर्वाचन गराउन सक्नु मुलुकका लागि ठुलो उपलब्धि भएको बताएकी हुन्। निर्वाचनले देशलाई शान्तिपूर्ण, लोकतान्त्रिक र संवैधानिक निकास दिएको भन्दै उनले यस प्रक्रियामा सहयोग पुर्याउने सबैप्रति आभार प्रकट गरेकी हुन्।
प्रधानमन्त्री कार्कीले लोकतन्त्रमा मतपत्र केवल कागजको टुक्रा मात्र नभएर नागरिकको आत्मसम्मानको प्रतीक भएको उल्लेख गरिन्। निर्वाचनबाट प्राप्त जनादेश सधैँका लागि स्थायी नहुने भएकाले नवनिर्वाचित जनप्रतिनिधिहरूले यसबारे सधैँ हेक्का राख्नुपर्ने उनको धारणा छ।कानुनी रूपमा पाँच वर्षको अवधि भए पनि जनादेशको नैतिक वैधता प्रत्येक क्षण जनताको विश्वासबाट पुनः अनुमोदित हुँदै जानुपर्नेमा उनले जोड दिइन्। जनताको विश्वास गुमाएको खण्डमा पदको कुनै अर्थ नरहने भन्दै उनले जनप्रतिनिधिहरूलाई थप जिम्मेवार बन्न आग्रह गरिन्।
महिला अधिकारका विषयमा बोल्दै प्रधानमन्त्रीले नेपालको संविधानले महिलाका हकलाई मौलिक हकका रूपमा सुनिश्चित गरेको स्मरण गरिन्। पछिल्ला दशकहरूमा राज्यका विभिन्न संरचनामा महिलाहरूको सहभागिता उल्लेखनीय रूपमा बढे पनि अझै पनि पूर्ण समानताको अवस्था नरहेको उनले बताइन्। महिलाहरू अझै पनि विभेद, असमान अवसर, लैङ्गिक हिंसा र पुरातन संस्कृतिजन्य असमानताबाट मुक्त हुन नसकेको भन्दै उनले आफ्ना अधिकारका लागि थप दृढताका साथ अघि बढ्न सबै महिलाहरूलाई आह्वान गरिन्।
समाजमा महिलाले जबसम्म पूर्ण सम्मान, सुरक्षा र समान अवसर प्राप्त गर्दैनन्, तबसम्म लोकतन्त्र सुदृढ हुन नसक्ने प्रधानमन्त्रीको निष्कर्ष छ। महिला दिवसका अवसरमा उनले राज्यका हरेक तहमा महिलाको अर्थपूर्ण उपस्थितिले मात्रै वास्तविक सामाजिक रूपान्तरण सम्भव हुने बताएकी छिन्।निर्वाचनपछिको नयाँ राजनीतिक परिवेशमा महिलाका मुद्दाहरूलाई प्राथमिकताका साथ अघि बढाउन उनले नवनिर्वाचित संसद् र सरकारको ध्यानाकर्षण समेत गराएकी छिन्।
