अमेरिकामा टिकटकलाई ४० करोड डलर जरिवाना
अमेरिकामा टिकटकलाई ४० करोड डलर जरिवाना
वि.सं.२०८३ भदौ ६ शनिवार ०९:५७
247
shares
shares
टिकटकले बालबालिकाको गोपनीयताको अधिकार उल्लंघन गरेको आरोपमा संयुक्त राज्य अमेरिकालाई ४० करोड डलर जरिवाना तिर्न मञ्जुर भएको छ। बालबालिकाको गोपनीयतासम्बन्धी मुद्दामा भएको यो अहिलेसम्मकै सबैभन्दा ठूलोमध्ये एक हो।
बीबीसीका अनुसार यो सन् २०२४ मा न्याय दायर गरेको मुद्दाबाट शुरू भएको हो । टिकटक र यसको माउ कम्पनी बाइटडान्सले १३ वर्षभन्दा कम उमेरका करोडौं प्रयोगकर्ताहरूको प्रचुर मात्रामा डाटा संकलन गरेको उक्त मुद्दामा आरोप लगाइएको थियो। सन् २००० मा पारित गरिएको संघीय कानुन ‘चिल्ड्रेन्स अनलाइन प्राइभेसी प्रोटेक्सन एक्ट’ विपरीत यो कार्य गरिएको थियो। समाचार अनुसार यसै कानुनअन्तर्गत अहिले अमेरिकाका दर्जनौं राज्यहरूले मेटामाथि पनि मुद्दा दायर गरिरहेका छन्।
सहायक महान्यायाधिवक्ता ब्रेट शुमाटेले यो मुद्दा शुरू हुँदाको अवस्थाभन्दा अहिले बालबालिका र अभिभावकहरू बढी सुरक्षित भएको बताएका छन्। यसअघि गुगलको युट्युबले सन् २०१९ मा १७ करोड डलर र एपिक गेम्सले सन् २०२२ मा २७ करोड ५० लाख डलर कोप्पा उल्लङ्घनका कारण जरिवाना तिरीसकेका छन्। मेटा कम्पनी पनि २९ वटा अमेरिकी राज्यका महान्यायाधिवक्ताहरूले लगाएको यस्तै आरोपहरूको सामना गरिरहेको छ।
यो सम्झौताअनुसार टिकटक र बाइटडान्सले तत्काल अमेरिकी न्याय मन्त्रालयलाई ३० करोड डलर तिर्नेछन्। त्यस्तै, संघीय व्यापार आयोगसँगको सन् २०१९ को मंजुरी डिक्रीलाई सरकारले खारेज गरेपछि थप १० करोड डलर तिर्नेछ। सम्झौताको एक भागको रूपमा, बाइटडान्सको पूर्ववर्ती संस्था म्युजिकल्लीलाई पनि कोप्पा उल्लङ्घनका लागि ५७ लाख डलर जरिवाना तिर्न र १३ वर्ष मुनिका प्रयोगकर्ताहरूको लागि अभिभावकीय सहमति लिन सुनिश्चित गर्न भनिएको थियो।
मुद्दा दायर गरिएका बेला अमेरिकाका कानुनविद्हरूले टिकटक प्रयोग गर्ने १७ करोडभन्दा बढी किशोरकिशोरीहरू रहेको र यो एप बालबालिका लक्षित रहेको बताएका थिए। तर, यसले प्रयोगकर्ताहरूको उमेर प्रभावकारी रूपमा जाँच्न वा नाबालकहरूका लागि अभिभावकीय सहमति लिन सकेको थिएन। पछिल्लो समय अमेरिकामा टिकटकको स्वामित्वमा परिवर्तन आएको छ जसअनुसार यसको अमेरिकी सञ्चालनको ८१ प्रतिशत हिस्सा लगानीकर्ताहरूको कन्सोर्टियमको स्वामित्वमा रहेको छ भने बाइटडान्ससँग १९ प्रतिशत हिस्सा मात्र बाँकी छ।
