कर्मचारीलाई १५ दिनमै तलब दिन सुरू
बहालवाला जनप्रतिनिधिहरूले राजिनामा नदिई उम्मेदवार बन्न नपाउने
वि.सं.२०७८ फागुन ५ बिहीवार ११:५४
481
shares
shares
बाहलवाला जनप्रतिनिधिले आसन्न वैशाख ३० गते हुने स्थानीय तहको निर्वाचनमा उमेदवार बन्न चाहे पदबाट राजीनामा दिनुपर्ने भएको छ । निर्वाचन आयोगले निर्वाचन आचारसंहितामा जनप्रतिनिधिले पदबाट राजीनामा दिएपछि मात्रै उमेदवार बन्न पाउने व्यवस्था गरेको छ ।
“बाहलवाला जनप्रतिनिधिले उमेदवार बन्नका लागि राजीनामा दिनुपर्ने व्यवस्था आचार संहितामा गरिएको छ,” आयोग स्रोतले भन्यो । आयोगका एक पदाधिकारीका अनुसार आचारसंहितालाई अन्तिम रूप दिने काम भइरहेको छ । आचारसंहिता भने केही समयपछि मात्रै जारी हुनेछ । त्यस्तै आयोगले उमेदवार बन्नका लागि बेरुजु र पेस्की फर्छ्योट भएको हुनुपर्ने व्यवस्था आचारसंहितामा गर्न लागेको छ ।
“कुनै उमेदवारी दिने व्यक्तिले आफ्नो नाममा कायम भएको तिर्नु बुझाउनुपर्ने बेरुजु फर्छ्योट गरिसकेको हुनुपर्ने छ। आफूले कुनै सरकारी निकायमा लिएको पेस्की फर्छ्योट गरिसकेको हुनुपर्नेछ,” ती पदाधिकारीले भने ।
बेरुजु र पेस्की फर्छ्योट स्थानीय तहको निर्वाचन प्रयोजनका लागि मात्रै नभएर प्रदेश र प्रतिनिधिसभाको निर्वाचनमा पनि लागु गर्ने आयोगको तयारी छ ।
“प्रतिनिधिसभा र प्रदेशसभाको हकमा भने संविधानमा नै राजीनामा दिनुनपर्ने भन्ने व्यवस्था गरेको छ । तर, पेस्की पर्छ्योट गर्नुपर्ने र बेरुजु फर्छ्योट गर्नुपर्ने कुरालाई ती पदमा समेत लागु हुन्छ,” ती पदाधिकारी भन्छन् ,“मनोनयन दिँदा मेरो नाममा कुनै किसिमको पेस्की बेरुजु बाँकी छैन भनेर घोषणा गर्नुपर्छ ।”
बेरुजु र पेस्की फर्छ्योट गरेको स्वघोषणा गरे पुग्ने व्यवस्था गर्न लागिएको छ । कसैले फर्छ्योट नगरेकोमा उजुरी परे कारबाही हुने आयोगका अर्का पदाधिकारी बताउँछन् ।
“आयोग हेर्न जाँदैन । स्वघोषणा गरे पुग्छ । तर कहीँकतै कसैले थाहा पाएर उजुरी दिए कारबाही हुन्छ । प्रमाणित भएर आचारसंहिता ठहर्छ,” ती पदाधिकारी भन्छन् “उमेदवारी दिएको छ भने उमेदवारी रद्द हुन्छ । जितेको छ भने ढाँटेको भनेर कारबाही गरेर अर्को निर्वाचन गर्न सक्ने समेत अधिकार छ ।”
