कांग्रेसका नेता अभिषेक गिरी पक्राउ
अर्थ मन्त्रालयले पौने १३ अर्ब रासायनिक मल खरिद गर्न स्वीकृति दियो
वि.सं.२०७८ चैत २ बुधवार २०:४७
637
shares
shares
आगामी आर्थिक वर्षका लागि रासायनिक मल खरिद गर्न अर्थ मन्त्रालयले पौने १३ अर्ब रुपैयाँ बढीको स्रोत सुनिश्चित गरेको छ । करिब एक लाख ४२ हजार मेट्रिकटन रासायनिक मल खरिद गर्न कृषि मन्त्रालयले गरेको प्रस्तावमा स्वीकृति सुनिश्चित दिइएको अर्थ मन्त्रालयले जनाएको छ ।
मल आयातको अग्रिम सुनिश्चितताका लागि आगामी वर्षको बजेट बाट सम्बोधन हुने गरी १२ अर्ब ७६ करोड रुपैयाँको स्रोत सुनिश्चितताको पत्र आएको कृषि मन्त्रालयका प्रवक्ता प्रकाशकुमार सञ्जेलले बताए । ‘बजेटपछि मल आयातको प्रक्रिया थाल्दा ढिलाइ हुने भएपछि अहिल्यै टेन्डर गर्नेगरी उक्त रकम सुनिश्चित भएको छ, कृषि सामग्री र साल्ट ट्रेडिङले टेन्डरको सूचना पनि निकाली सकेका छन्’ प्रवक्ता सञ्जेलले भने ।
कृषि सामग्रीलाई ७० र साल्टलाई ३० प्रतिशत खरिद अनुमति दिने सम्झौता अनुसार ७५ हजार मेट्रिकटन मल आयातको ठेक्का सूचना निकालिएको उनले बताए । थप ६७ हजार मेट्रिकटन मल आयातका लागि फेरि सूचना जारी गरिने मन्त्रालयको भनाइ छ ।
केही समय अघि मन्त्रालयकै प्रस्तावमा अर्थले मल खरिदको स्रोत सुनिश्चितताकै लागि ११ अर्ब ७५ करोड रुपैयाँ दिने सहमति दिएको थियो । उक्त रकम भने भारत सँग भएको जीटूजी सम्झौता अनुसारको मल खरिदका लागि खर्च गरिने मन्त्रालयको भनाइ छ ।
जीटूजीको एक लाख ५० हजार र ग्लोबल टेन्डरबाट खरिद हुने एक लाख ४२ हजार गरी अर्को वर्ष कुल २ लाख ९२ हजार मेट्रिकटन मल आयात सुनिश्चित गर्न खोजिएको मन्त्रालयले जनाएको छ । दुवै स्रोत बाट प्राप्त हुने मल धानको सिजनकै लागि हुनेगरी ल्याउन छलफल भइरहेको उनको भनाइ छ ।
