एउटै मञ्चमा आज पहिलो पटक बालेन, रवि र गगन
‘नेपालको संविधान प्रति पूर्ण निष्ठावान रहेको’ भनी स्वघोषणा गर्न बाध्य पार्नु आपत्तिजनक : तमलोपा
वि.सं.२०७८ चैत १९ शनिवार १५:३८
637
shares
shares
काठमाडौं । तराई मधेश लोकतान्त्रिक पार्टीले स्थानीय तह निर्वाचनमा उम्मेदवार मनोनयनका लागि ‘नेपालको संविधान प्रति पूर्ण निष्ठावान रहेको’ भनी स्वघोषणा गर्न बाध्य पार्नु आपत्तिजनक भएको बताएको छ । शुक्रबार बसेको पार्टीको बैठकले स्थानीय तहको उम्मेदवार हुने योग्यता स्थानीय तह निर्वाचन ऐन २०७३ मा प्रष्ट गरिएको भन्दै त्यस बाहेकका नयाँ व्यवस्था थोपर्न नहुने निर्णय गरेको हो ।
नेपालको संविधानको भाग ३१ मा संविधान संशोधनको व्यवस्था रहेको भन्दै तमलोपाले संशोधनको प्रक्रियाको सुरुवात संविधानको कुनै प्रावधानको असहमति बाटै हुने भएकाले संविधान प्रति पूर्ण निष्ठावान रहेको भनी स्वघोषणा गर्न बाध्य नपार्न आग्रह गरेको छ ।
‘नेपालको मधेशी, मुस्लिम, थारु, आदिवासी जनजाति संविधानका कतिपय प्रावधानमा संशोधनको माग गर्दै आइरहेको र यसका निमित्त जनताले निरन्तर आन्दोलन गरिरहेको तथ्यलाई बिर्सी उम्मेदवारले उम्मेदवारी मनोनयन गर्दा नेपालको संविधान प्रति पूर्ण निष्ठावान रहेको स्वघोषणा गर्न बाध्य पार्ने व्यवस्था प्रति आपत्ति व्यक्त गर्दछ’ बैठक पछि शनिबार अध्यक्ष वृषेशचन्द्र लालले जारी गरेको विज्ञप्तिमा भनिएको छ ।
तमलोपाले स्थानीय तह निर्वाचनमा पार्टीका व्यवस्थित सहभागिता, उम्मेदवार चयन, प्रचार प्रसार व्यवस्थापन र रेखदेखका निमित्त अध्यक्ष लालको नेतृत्वमा निर्वाचन समिति गठन गरेको छ । जसमा वरिष्ठ नेता डा. विजयकुमार सिंह र केन्द्रीय सदस्यहरु मोहम्मद असगर अली, विन्दु ठाकुर र रामप्रित यादव सदस्य छन् ।
