रास्वपा महाधिवेशनको वेथिति हर्दा हामीले देश चलाउन सक्दैनौ है साथी हो : रास्वपा नेता एंव...
नेपाली सेनाका उपरथी निर्मल थापा यूएन मिसनको फोर्स कमाण्डर नियुत्त
वि.सं.२०७९ असार ३२ शनिवार १६:२७
585
shares
shares
काठमाडौं ।संयुक्त राष्ट्र संघ (यूएन) का महासचिव एन्टोनियो गुटेरेसले नेपाली सेनाका उपरथी निर्मलकुमार थापालाई फोर्स कमान्डर नियुक्त गर्नुभएको छ । यूएन महासचिव गुटेरेसले शुक्रवार थापालाई सिरिया र इजरायल बीचको विवादित क्षेत्र गोलान हाइटमा ४० भन्दा बढी मुलुकका शान्ति सैनिकहरुलाई ‘यूएन डिसइन्गेजमेन्ट अब्जर्भर फोर्स’ को नेतृत्व गर्ने जिम्मेवारी दिनुभएको हो ।
शान्ति मिसनको दुई वर्षे जिम्मेवारी पूरा गरेर नेपाली सेनाका रथी ईश्वर हमाल फर्किसक्नु भएको छ । अब हमालको स्थानमा थापाले कमाण्ड सम्हाल्नु हुनेछ । ‘यो नेपाल र नेपाली सेनाका लागि गर्वको कुरा हो । नेपाली सेनाले लामो समय देखि विश्व शान्तिको लागि योगदान गर्दै आइरहेको छ,’ उपरथी थापाले भन्नुभयो, ‘यो जिम्मेवारीले मलाई थप चुनौती थपिदिएको छ । जसले म इमान्दारिताका साथ पूरा गर्ने छु ।’ थापाले अहिले आफ्नो नियुक्तिका बारेमा मात्र थाहा भएको र कुन मिति बाट जिम्मेवारी सम्हाल्न जाने भन्ने विषयमा जानकारी आइनसकेको बताउनु भयो । फोर्स कमान्डरको जिम्मेवारी पहिलो पटक एक वर्षका लागि हुन्छ । त्यसपछि अर्को वर्ष पनि थप्ने प्रावधान रहेको छ ।
नेपाली सेनाले नेपाल सरकारको स्वीकृतिमा उपरथी थापालाई फोर्स कमान्डरका लागि स्वीकृति दिएको थियो । त्यही आधारमा सेनाले फोर्स कमान्डरको गृहकार्य अघि बढाएको हो । थापा हाल सैनिक मुख्यालयको युद्ध महानिर्देशनालयका महानिर्देशकका रूपमा कार्यरत हुनुहुन्छ । विश्व शान्तिका लागि सेना पठाउने देश मध्ये संख्याको हिसाबले नेपाल दोस्रो नम्बरमा छ । नेपाली सेनाका अनुसार बुधबार सम्म विश्वभरका विभिन्न ११ मिसनमा ५ हजार ५ सय ७० सैनिक शान्ति स्थापनाका लागि खटिएका छन् । नेपाल सन् १९५५ मा यूएनको सदस्य भएको थियो । त्यसपछि सन् १९५८ मा लेबनान र १९६६ मा भारत–पाकिस्तानमा ‘मिलिटरी अब्जर्भर’ र त्यसपछि सन् १९७४ मा इजिप्टको सिनाईमा शान्ति सैनिक फौज पठाएर नेपाली सेनाले विश्व सुरक्षाका लागि कदम अघि बढाएको हो । हालसम्म नेपाली सेनाले विभिन्न मुलुकका ४४ भन्दा बढी मिसनमा १ लाख ४० हजार ३ सय ५४ शान्ति सैनिक पठाइसकेको छ ।
सिरिया, लिबिया, इराक, कंगो, हाइटी, लेबनान, सुडान, दक्षिण सुडान, इजरायल, कंगो, माली लगायत द्वन्द्वग्रस्त मुलुकमा नेपाली सैनिकले शान्ति स्थापनाका लागि काम गरेको छ । उपरथी थापाअघि फोर्स कमान्डरको जिम्मेवारी ६ सैनिक अधिकृतहरूले सम्हालिसकेका छन् । यसरी कमाण्ड सम्हाल्नेहरुमा पूर्वप्रधानसेनापति पूर्णचन्द्र थापा तथा अन्य जर्नेलहरूमा बालानन्द शर्मा, कृष्णनारायण थापा, भिक्ट्रीशमशेर राणा, पवनजंग थापा र ईश्वर हमाल हुनुहुन्छ ।
