विष्णु पौडेललाई गैरकानूनी रूपमा थुनामा राखिएको भन्दै सर्बोच्च अदालतमा बन्दी प्रत्यक्षीकरणको रिट दर्ता
राज्यमन्त्री वलीको घटना छानबिन माथि गर्न प्रदेश सरकारको टोली दाङमा
वि.सं.२०७९ असार ८ बुधवार १५:२५
754
shares
shares
दाङ ।लुम्बिनी प्रदेश स्वास्थ्य तथा परिवार कल्याण राज्यमन्त्री विमलाकुमारी खत्री वलीको घटना माथि छानबिन गर्न प्रदेश सरकारले गठन गरेको टोली दाङ आएको छ । राज्यमन्त्री वलीले गत जेठ ३१ गते तुलसीपुर उपमहानगरपालिका–५ स्थित एकराज बस्नेतको घरमा पुगेर उनकी श्रीमती र पाँच बर्षकी छोरीलाई हातपात गरेकी थिइन् ।
सोही घटना बारे छानबिन गर्न बनेको समितिको टोली मंगलबार राति नै दाङ आएको हो । समितिको संयोजकमा आन्तरिक मामिला तथा सञ्चार मन्त्री तिलकराम शर्मा, महिला, बालवालिका तथा कानुनमन्त्री रमा घर्ती, मुख्य न्यायाधिवक्ता श्रीकृष्ण सुवेदी लगायत रहेका छन् । उक्त टोलीले घटना बारे छानविन गर्न बुधबार प्रहरी र पीडित परिवारका सदस्य संग कुराकानी गर्नेछन् । समितिले घटना बारे छानबिनपछि प्रतिवेदन तयार पारेर मन्त्रिपरिषद बैठमा पेश गर्ने समितिका संयोजक सञ्चार मन्त्री शर्माले बताए ।
राज्यमन्त्री वलीले भने वाईसिएल नेता एकराज बस्नेत संग आफ्नो लेनदेन कारोबार रहेकाले यसै विषयमा कुराकानी गर्न उनको घरमा पुगेको बताएकी छन् । वाईसीएलका नेता एकराजले ३५ लाख रकम अहिले सम्म फिर्ता नगरेकाले खोज्दै गएको र घरमा उनकी श्रीमती संग हात हालाहालको अवस्था सिर्जना भएको बताइन् । एकराजकी श्रीमती मिना बस्नेतले भने आफू माथि हातपात गरेको भनी आरोप लगाउँदै राज्यमन्त्री वली विरुद्ध प्रहरीमा जाहेरी समेत दिएकी छन् ।
