भोली सोमबार बोलायो कांग्रेसले केन्द्रीय कार्यसम्पादन समितिको बैठक
राष्ट्रपति रामचन्द्र पौडेल स्वदेश प्रस्थान
वि.सं.२०८२ कात्तिक २० बिहीवार १५:३४
936
shares
shares
काठमाडौँ । राष्ट्रपति रामचन्द्र पौडेल कतारको राजधानी दोहामा आयोजित ‘सामाजिक विकासका लागि दोस्रो विश्व शिखर सम्मेलन’ मा सहभागी भएर बिहीबार स्वदेश प्रस्थान गरेका छन् ।
राष्ट्रपति पौडेल नेपाली प्रतिनिधिमण्डलको नेतृत्व गर्दै कतारका अमिर शेख तमिम बिन हमद अल थानीको निमन्त्रणामा सोमबार दोहा पुगेका थिए ।उनलाई आज हमाद अन्तर्राष्ट्रिय विमानस्थलमा कतारका लागि नेपाली राजदूत रमेशचन्द्र पौडेलसहित अन्य उच्च अधिकारीहरूले बिदाइ गरेका थिए ।
सम्मेलनको मुख्य सत्रलाई राष्ट्रपति पौडेलले मङ्गलबार सम्बोधन गरेका थिए। उनले गरिबी निवारण, पूर्ण र उत्पादक रोजगारी, मर्यादित काम र सामाजिक समावेशीकरण विषयक उच्चस्तरीय गोलमेच सम्मेलनलाई पनि सम्बोधन गरेका थिए । सोही दिन राष्ट्रपति पौडेलले संयुक्त राष्ट्रसङ्घका महासचिव एन्टोनियो गुटेरेससँग शिष्टाचार भेटवार्तासमेत गरेका थिए ।
संयुक्त राष्ट्रसङ्घको महासभाको निर्णयअनुसार दोहामा भएको यो शिखर सम्मेलनमा वर्तमान विश्वले सामना गरिरहेको विकासको असमानता, जनसङ्ख्यामा आएको असन्तुलन र प्रविधिको सामाजिक प्रभावलगायतका विषयमा छलफल भएको थियो ।नेपाल हाल राष्ट्रसङ्घको आर्थिक तथा सामाजिक परिषद्को अध्यक्ष रहेको छ। राष्ट्रपति पौडेल प्रथम महिला सबिता पौडेलसहित प्रतिनिधिमण्डलको नेतृत्व गर्दै सम्मेलनमा सहभागी भएका थिए ।
