साउन्ड सिस्टममा समस्या देखिएपछि राष्ट्रियसभाको बैठक स्थगित
सत्तारुढ गठबन्धको छलफल हेर्दा सहमति जुटिहाल्ने सम्भावना देखिएको छैन
वि.सं.२०७९ भदौ १६ बिहीवार २१:३२
585
shares
shares
काठमाडौं ।सिट बाँडफाँटका लागि सत्तारुढ गठबन्धका नेताहरु बिहीबार बिहानै देखि बालुवाटारमा छलफलमा जुटेका छन् । कहिले शीर्ष नेताहरुको संयुक्त त कहिले वान अन वान छलफल हुन्छ । कार्यदलका सदस्यहरु पनि बालुवाटारमा छन् । उनीहरु सँग पनि शीर्ष नेताहरु बेलाबेला छलफल गर्छन् । तर राति ८ बजेसम्म पनि कुनै सहमति जुटेको छैन । छलफलमा सहभागी नेताहरुका अनुसार अहिलेसम्मको छलफल हेर्दा सहमति जुटिहाल्ने सम्भावना पनि देखिएको छैन ।
कसको के प्रस्ताव ?
नेताहरुका अनुसार छलफलहरुमा माओवादी केन्द्रका अध्यक्ष पुष्पकमल दाहाल प्रचण्डले ५०/५० को प्रस्ताव राखेका छन् । प्रतिनिधिसभाको कुल १६५ सिट मध्ये आधा कांग्रेसले लिने र बाँकी अरु दलले भागवण्डा गर्ने उनको प्रस्ताव छ ।उनको प्रस्ताव अनुसार सिट बाँडफाँट गर्ने हो भने कांग्रेसको सिट ८० आसपास हुने छ भने माओवादीले ५० हाराहारी सिट लिनसक्छ । एकीकृत समाजवादी र जसपाले १५/२० सिट पाउन सक्ने एक नेताले सुनाए ।
एकीकृत समाजवादीका अध्यक्ष माधवकुमार नेपालले भने कांग्रेसलाई ७० सिट मात्र लिन प्रस्ताव गरेका छन् । अरु सिट गठबन्धनमा सहभागी दलहरुमा भागवण्डा गर्ने उनको प्रस्ताव छ । कांग्रेसलाई ७० सिटमा झार्न सके आफ्नो दलले कम्तिमा २५/३० सिट सम्म पाउन सक्ने समाजवादीका नेताहरुको बुझाइ छ । जनता समाजवादी पार्टीका अध्यक्ष उपेन्द्र यादवले भने आफ्नो दलले २२/२५ सिट पाउनुपर्ने अडान राखेका छन् । १२/१५ सिट लिने हो भने तालमेल गर्नुको कुनै अर्थ नहुने उनको तर्क छ । ‘अहिले ८/९ जना सांसद छन्, १२/१३ सिट लिने हो भने जित्ने ८/९ नै हो भन्ने उहाँको बुझाइ छ,’ एक नेता भन्छन्, ‘उल्टो पार्टीमा विद्रोह हुन्छ र समानुपातिकको सिट पनि घट्छ ।’
यति थोरै सिट पाउने हो भने गठबन्धन गर्नुको साटो एक्लै चुनाव लड्ने उनले बताएका छन् ।राष्ट्रिय जनमोर्चाका अध्यक्ष चित्रबहादुर केसीले पनि बाग्लुङ र प्युठान नपाउने हो भने गठबन्धन गर्नुको अर्थ नहुने बताएपछि कांग्रेस नेता अलमलमा परेका छन् । पार्टी सभापति शेरबहादुर देउवा सँगै शीर्ष नेताहरुको छलफलमा सहभागी वरिष्ठ नेता रामचन्द्र पौडेलले भने ९० सिट सम्म कांग्रेस आउन सक्ने बताएका छन् । कार्यदलमा रहेका कांग्रेस महामन्त्री गगनकुमार थापाले १०० सिटको दाबी पेश गरेका थिए । बालुवाटारमा रहेका एक नेता भन्छन्, ‘कहिले माथि गयो, कहिले तल आयो भइरहेको छ । सहमति जुट्ने संकेत देखिएको छैन ।’
